Otabek G'ulomxo'jaev: O'rtoqlik o'yinlarida tarkibdagi barcha futbolchilarga imkoniyat beramiz

O'yindan keyingi matbuot anjumanida dastlab mehmonlar bosh murabbiyi Genri Renosh ishtirok etdi.

“O'yindagi muhitni ko'rib lol qoldim. Bemalol ayta olamanki, O'zbekistonga qarshi o'yin jamoamiz uchun fantastik darajada o'tdi. Stadiondagi muhit esa shunchaki super edi. Ushbu uchrashuv hammamizga yoqdi. Futbolchilarimiz birinchi marta bunday yuqori darajadagi o'yinda ishtirok etishdi va o'ylaymanki, mazkur bahsni ular hech qachon unutishmaydi.

O'zbekiston terma jamoasi esa oldindan kutganimizdek tezkor va hujumkor o'yin namoyish etdi. Ularning 17-raqamli futbolchisi (Ruslan Roziev) esa himoyachilarimizga ko'proq muammolar tug'dirdi. Umuman aytganda, durang natijadan mamnunman. CHunki uchrashuv davomida O'zbekiston terma jamoasida gol urish uchun imkoniyatlar ko'p bo'ldi. Ammo darvozabonimiz jamoamizni bir qator gollardan saqlab qoldi. Biz esa o'yinni himoyadan o'tkazganimiz uchun oldingi chiziqda o'zimiz kutganchalik vaziyatlarga ega bo'lmadik”, - dedi Genri Renosh.

SHundan so'ng, O'zbekiston yoshlar terma jamoasi bosh murabbiyi Otabek G'ulomxo'jaev o'yin haqida o'z fikrlarini bildirib o'tdi.

“Avvalambor, stadiondagi muhit haqida gapirmoqchi edim. Hammasi yuqori darajada tashkil etildi. Muxlislar biz uchun qoyilmaqom muhitni yaratib berishdi. Buning uchun ulardan minnatdormiz. Hammasi men kutganimdan ham ortiq darajada bo'ldi. O'yin yaxshi o'tdi. O'ylashimcha, navbatdagi uchrashuvimiz yanada qiziqarli kechadi. Ha, bizda golli imkoniyatlar ko'p bo'ldi. Ammo oxirgi zarbani berishda yigitlarga aniqlik etishmadi. Ammo g'alabaga loyiq bo'lish uchun o'sha vaziyatlarda oxirgi zarbani aniq bera olish kerak. Tarkibimizda hali 17 yoshga to'lmagan 3-4 nafar bolalar ham bor. To'g'ri, hujum qilishni uddalayapmiz. Biroq oxirgi zarbani berishda baribir tajriba etishmayapti.

Ammo meni xursand qiladigani, jamoamizda individual jihatdan yaxshi futbolchilar ko'p. Futbolning chiroyi shundaki, oldingi chiziqdagi futbolchilarning kreativligidan to'g'ri foydalanish kerak. Endi Namanganda o'tadigan o'yinda tarkibda o'zgarishlarni qilamiz. Biz 22 nafar o'yinchi bilan kelganmiz va bugun hammasi bo'lib 16 ta futbolchi maydonga tushdi. Namanganda esa bugun o'ynamagan 6 nafar futbolchiga asosiy tarkibda o'zlarini ko'rsatish uchun imkoniyat beraman”, - dedi Otabek G'ulomxo'jaev.