Oliy ligada o'ynamay legionerga aylangan Husniddin G'ofurov 25 yoshga to'ldi

Bugun O'zbekiston milliy terma jamoasiga nomzod yarim himoyachi Husniddin G'ofurov 25 yoshini qarshi olyapti. Farg'onalik futbolchi yaqindagina "Paxtakor" azosiga aylandi va yangi klubi bilan bir yarim yillik shartnomaga imzo chekdi. 

- Maktabda tahsil olayotgan paytimdayoq millionlar o'yiniga mehrim tushib qolgan, - deya futbodagi ilk qadamlarni eslaydi bugungi kun qahramoni. - Oltiariqdagi 38-maktabda o'qib yurgan kezlarim jismoniy tarbiya fanidan dars bergan Mahmud aka qo'l ostida mashg'ulot o'tkazardim. Hozir ham Oltiariqqa borsam, albatta u kishi bilan ko'rishib qaytaman. Keyin Farg'ona futbol maktab-internatiga o'tganman. Bu erda murabbiylar Durbek va Ravshan akalar qo'l ostida o'ynaganman. Keyin Farg'ona viloyati ikkinchi ligasida to'p tepdim. Xushbek Qosimov va Bahrom aka jamoasida faoliyat olib bordim. O'yinlarimni kuzatgach bir nechta klublardan takliflar bo'ldi. Ular orasidan o'zim uchun eng maquli "NBU-Osiyo"ni tanladim. O'zimni birinchi ligada ko'rsata olsam, yanada kuchli jamoalarga o'tish imkoniyati paydo bo'lishini o'ylaganman. Muxtor Qurbonov boshchiligidagi "bankirlar" safida bir mavsum to'p tepdim.

Etiborga molik jihati shundaki, Husniddin G'ofurov oliy ligada o'ynamay turib, birinchi liga klubidan legionerga aylangan kam sonli futbolchilar sirasiga kiradi. Qanot yarim himoyachisi poziciyasida o'ynaydigan G'ofurov professional faoliyatini o'zi aytgandek 2012 yili "NBU-Osiyo" jamoasida boshlagan. 2014 yil Serbiyaning "Yavor" klubi bilan shartnoma imzolab, to'rt yil davomida shu jamoa sharafini himoya qilgan. Keyin yana bir yil Serbiyaning boshqa bir klubi "Mladost"da to'p tepgan. 2018 yildan to shu kungacha "Lokomotiv" safida maydonga tushdi va O'zbekiston chempioni bo'ldi.

- Faoliyatimdagi eng chiroyli golim? Menimcha, "Paxtakor"ga qarshi derbi o'yinida urgan golim eng chiroylisi bo'lgan. O'sha kuni juda asabiy bahs bo'lgandi. Hisobda ortda qolayotgandik va so'nggi daqiqalarda raqib darvozasiga to'p kiritib, jamoamni mag'lubiyatdan qutqarib qolgandim.

Yuqorida aytganimizdek, Husniddin G'ofurov yaqinda "Paxtakor" bilan bir yarim yillik shartnoma imzoladi. 

"Paxtakor"ga xush kelibsan, Husniddin!, - deb yoziladi "Paxtakor" klubi rasmiy saytidagi xabarda. 

Husniddin G'ofurov

Tug'ilgan sanasi: 29.07.1994

O'ynagan jamoalari: 2012-2013 "NBU-Osiyo" 20 o'yin, 14 gol

2014-2017 "Yavor" Serbiya 80 o'yin, 9 gol

2017 "Mladost" Serbiya 8 o'yin, 1 gol

2018-2019 "Lokomotiv" 37 o'yin, 4 gol

Fursatdan foydalanib, bugun tavallud ayyomini nishonlayotgan Husniddin G'ofurovni tug'ilgan kuni bilan muborakbod etamiz. Yangi klubida yorqin o'yin namoyish etib, yana O'zbekiston milliy terma jamoadan chaqiruv olishini tilaymiz.