Oliy liga-2014. Ko'zguda – “Paxtakor”

Odatdagidek bu yil oliy ligada ishtirok etuvchi jamoalar haqida qisqacha to'xtalishda davom etamiz. Demak, ko'zguda – “Paxtakor”.

O'TGAN YILGI O'RNI: 4
“Paxtakor” o'tgan mavsmuni 4-o'rinda yakunladi va OCHLsiz qoldi. Bundan kimdir xafa bo'ldi, kimdir to'g'ri tushundi. Lekin jamoaning bu yilgi maqsadlari ulkan.

BOSH MENEJER: Samvel Babayan
Murod Ismoilov “Neftchi”ga o'tib ketganidan so'ng jamoa bosh murabbiysiz qoldi. Ammo oradan ko'p o'tmay klub menejeri Samvel Babayan barchasini o'z zimmasiga olishini malum qildi. Ayni payt “Paxtakor”da Babayan barcha natijalar uchun masul shaxs hisoblanadi.

ENG YAXSHI XARID: Egor Krimec
Krimecni xarid deb bo'lmaydi, chunki Xitoyda ijara asosida to'p tepayotgan edi. Himoyachi Xitoydan qadrdon jamoasi “Paxtakor”ga qaytdi. SHubhasiz, u bilan jamoaning himoya chizig'i kuchaydi.

ENG KATTA YO'QOTISH: Oybek Qilichev
Oybek Qilichev – iqtidorli futbolchi. Mehnatkash va ancha tirishqoq. U og'ir mehnatdan qochmaydi. Albatta, bunday o'yinchining yo'qligi “Paxtakor”ga qiyinchilik tug'dirishi mumkin. Lekin, bu – futbol, kimdir keladi, kimdir ketadi.

JAMOA ETAKCHISI: Kaxi Maxaradze
Jamoa etakchisi hozircha Kaxi Maxaradze bo'lib turibdi. Gruziyalik legioner maydon markazida katta hajmdagi ishni bajarib kelmoqda. Qolaversa, u jamoa sardori. Bir so'z bilan aytganda, sheriklarini ortidan etaklay oladi.

O'ZINI KO'RSATISHI KUTILAYOTGAN FUTBOLCHI: Jamshid Iskanderov
Iskanderov o'tgan yiliyoq kashf qilib bo'lingandi. Endi uning bu yilgi chempionatda yanada o'zini ko'rsatishi qolyapti. O'ylaymizki, Jamshid yildan yilga pishib etilib bormoqda.

CHEMPIONATNI KIMGA QARSHI BOSHLAYDI: safarda “Andijon”
“Paxtakor” 1-turni ertaga “Andijon”ga qarshi o'tkazadi. Juda qiziqarli o'yin bo'lishi kutilmoqda.

Xayrulla Xoliqov.