O'FA Hakamlar bo'limi "Olimpik" - "Paxtakor" uchrashuvidagi vaziyatlarga baho berdi

Xususan, o'yinning 12-daqiqasida “Paxtakor” azosi Ikrom Aliboev raqibning oyog'iga butsaning tag qismi bilan o'ta qo'pol zarba berdi. Uchrashuv bosh hakami avval sariq kartochka ko'rsatdi, so'ng VAR uni monitorga taklif qilgach, qarorini qizil kartochkaga almashtirdi. Mutaxassislar fikriga ko'ra, qizil kartochka to'g'ri berildi. 

57-daqiqada “Paxtakor” futbolchisi raqibidan ilgarilab ketayotganda himoyachi uni qo'li bilan to'xtatdi. Hakam jarima to'pi va himoyachiga sariq kartochka ko'rsatdi. Ammo VAR vaziyatni ko'rgach, sariq kartochka qizilga o'zgartirildi. 

Ushbu vaziyatda Hakamlar bo'limi quyidagi kriteriylarga to'xtalib o'tdi: 

• himoyachi qo'pollik ishlatmaganida hujumchi darvozabon bilan yaqqol birga bir chiqish imkoniyatiga ega edi;

• hujumchiga nisbatan qo'pollik ishlatilgan vaqtda uning to'p bilan masofasi juda yaqin edi;

• qo'pollik ishlatilgan vaziyatda darvozabon ham o'z joyida qolgan edi. Agarda darvozabon o'rnini tark etib, tezlik bilan to'pga ega chiqqanda vaziyatga boshqacha baho berish mumkin bo'lar edi. SHulardan kelib chiqib, mutaxassislar ko'rsatilgan qizil kartochkani to'g'ri deb baholadilar.

Bundan tashqari, 69-daqiqada “Olimpik” futbolchisi raqib jarima maydonchasi ichida yiqildi. Bosh hakam o'yinni davom ettirishni ko'rsatdi. VAR hakamlari takroriy lavhalarni sinchiklab ko'rib, penalti belgilash uchun yaqqol asos yo'q ekanligiga ishonch hosil qilishdi. Mutaxassislar bosh hakam chiqargan qaror to'g'ri ekanligini tasdiqlashdi.