No'mon Hasanov oliy liga tarixidagi eng kuchli hujumchilarni sanab berdi

No'mon Hasanov hozirgi futbolchilar haqida quyidagi fikrlarni bildirdi: 

"Biz paytimizda futbolni o'ylab o'ynardik. Hozir esa ko'p o'yinchilar robotga o'xshab qolgan. To'p ketidan doim behudaga yugurish shart emas. Futbolni kerak bo'lsa bir joyda turib aql bilan o'ynasa ham bo'ladi. Men hozirgi jamoani yiqqanimda boshida ko'p qiynalganman".

"Lekin o'zbek futbolining asosiy muammosi hujumchilarda deb o'ylamayman. Ko'proq darvozabonlar muammosi bor degan fikrdaman. Bizda yaxshi darvozabonlar faqat uch-to'rtta klubda bor, xolos. Masalan, Ignatiy Nesterovni olaylik. U haqiqatdan kuchli darvozabon va unga o'xshashini topish qiyin".

SHuningdek, "Qo'qon-1912" bosh murabbiyi eng kuchli hujumchilarga to'xtalib o'tdi: 

"Oliy liga tarixidagi eng kuchli hujumchilarmi? Biz paytimizda kuchli hujumchilar juda ko'p edi. Ketma-ket sanaydigan bo'lsam, Igor SHkvirin, Jafar Irismetov, Oleg SHackix, Farid Xabibulin... bu ro'yxatni istalgancha davom ettirish mumkin. Ular nima uchun zo'r bo'lgan? CHunki ular vaqtida "ochilishni" va vaziyatlardan unumli foydalanishni bilardi". 

"Biz o'ynagan paytda bir-birimizga ko'p gapirib o'tirmasdik, qo'l harakati yordamida darrov bir-birimizni tushunib olardik. Afsuski, hozirgi hujumchilar bunaqa narsalarni bilishmaydi. O'z vaqtida bizga murabbiylar nimadir o'rgatsa tez qabul qilib olardik, lekin hozirgilar bir soat tushuntirsangiz ham xo'p-xo'p degani bilan ko'p narsani tushunmaydi. Agar bugungi oliy liga haqida gapiradigan bo'lsam, eng kuchli hujumchi Marat Bikmaev bo'lsa kerak". 

X.Xoliqov.