Nodirjon Kamolov: Oliy ligadagi debyutim vodiydagi uchrashuvga to'g'ri kelganidan xursandman
25 apr 2016 10:03
Yangiliklar
Nodirjon Kamolov: Oliy ligadagi debyutim vodiydagi uchrashuvga to'g'ri kelganidan xursandman
- Bugun hayotimda o'chmas iz qoldirishi tabiiy, - deydi Nodirjon. - O'zim Farg'ona futboli maktabi tarbiyalanuvchisiman. Ko'p yillardan beri “Neftchi” yoshlari tarkibida to'p surib kelayotgandim. Xabaringiz bor, qishda “Qizilqum” jamoasi Farg'onada “Hokim kubogi” turnirida ishtirok etdi. Ana shu turnirda o'yinimni kuzatgan “Qizilqum” futbol klubi bosh menejeri Hamidjon Aktamov va jamoa murabbiylari meni Navoiyga taklif etishdi va ular bilan shartnoma imzoladim.
Mavsum boshidan beri “Qizilqum” yoshlari tarkibida muntazam maydonga tushib kelish bilan birgalikda asosiy tarkibda mashg'ulotlarni davom ettirib kelyapman. Afsuski, kecha yoshlarimiz kichik - 0:1 hisobida raqibga imkoniyatni boy berganida dilim ozgina xira bo'lgandi. Bugun asosiy tarkiblar bahsida yirik - 3:0 hisobidagi g'alabadan so'ng barchasi unut bo'ldi. Qolaversa, bugun ilk marotaba oliy ligada o'z debyutimni nishonladim. Garchi, zaxiradan maydonga tushib, yigirma besh daqiqa o'ynagan bo'lsam-da, jamoamiz g'alabasiga hissa qo'shganimdan juda xursandman.
Debyut o'yinim Qo'qonda bo'lgani uchun ota-onam, yaqinlarim va do'stlarim xatti-harakatlarimni stadionning o'zidan kuzatib borishdi. Niyatim kelgusida yanada ko'proq o'z ustimda ishlab, “Qizilqum” jamoasi muvaffaqiyatlariga ulush qo'shish, qolaversa, O'zbekiston milliy terma jamoasi libosini kiysam, deyman. Muhimi, murabbiylarimiz ishonchini oqlash uchun bor kuch va mahoratimni ishga solaman, - deydi Kamolov.
Eslatib o'tamiz, Nodirjon Kamolov 2011 yili Aleksey Evstafeev bosh murabbiyligida Meksikada o'smirlar o'rtasida o'tgan jahon chempionatida O'zbekiston terma jamoasi tarkibida ishtirok etgan. O'shanda ilk marotaba hamyurtlarimiz musobaqaning kuchli sakkizligidan joy olib barchani lol qoldirishgandi.
“Qizilqum” PFK Matbuot xizmati.
Fikrlar