"Navbahor"ning Namangandagi noxush seriyasi davom etdi, Arveladzedan esa qiziq statistika
16 sen 2019 00:34
Yangiliklar

"Navbahor"ning Namangandagi noxush seriyasi davom etdi, Arveladzedan esa qiziq statistika

Teglar : "Navbahor" "Paxtakor"SHota Arveladze

Namanganning "Navbahor" jamoasi Superliga doirasidagi o'z uyida o'tkazilgan oxirgi uchala bellashuvda imkoniyatni boy berdi.

Andrey Kanchelskisni ortga qaytargan "Navbahor" o'zining eski-yangi murabbiyi qo'l ostida Superliganing 19-turida "Paxtakor"ga imkoniyatni boy berdi. Doston Hamdamov tomonidan kiritilgan yagona gol uchrashuv taqdirini mehmonlar foydasiga hal etdi.

SHu tariqa "Navbahor" ikkinchi davra hisobidan o'z uyidagi birorta o'yinda g'alaba qozongani yo'q. Namangandagi g'alabasiz seriya 3 o'yinga etdi. Bunga qadar jamoa avvaliga "Qizilqum"ga, keyinchalik AGMKga yutqazgandi. Bu safar "Paxtakor" "Qizilqum" va AGMK eplagan ishni uddaladi. Qizig'i, uchala uchrashuvda ham yagona gol bahs taqdirini "Navbahor" raqiblari foydasiga hal etdi.

Yana bir etiborga molik jihat shundaki, SHota Arveladze O'zbekistondagi murabbiylik faoliyati davomida o'zaro to'qnashgan va mag'lubiyatga uchrata olmay kelayotgan rossiyalik mutaxassis Kanchelskisni uchinchi uchrashuvda dog'da qoldirishga erishdi. Gruziya va rossiyalik murabbiylarning O'zbekistondagi qarama-qarshiligida ikki safardan buyon durang qayd etilayotgandi. Bu gal Arveladze mazkur seriyaga barham berdi.

Etiborlisi, Arveladze O'zbekistondagi faoliyati davomida to'qnash kelgan murabbiylar orasidan faqatgina Baxtiyor Ashurmatovni mag'lub etishga ulgurmadi. O'zbekiston kubogi finalida Ashurmatovdan mag'lub bo'lgan mutaxassis hozircha chempionat doirasida mazkur hamkasbi bilan duch kelgani yo'q. O'tgan mavsum AGMK quyi oltilikka tushib ketgach Ashurmatov jamoaga kelgan bo'lsa, bu yili esa "Paxtakor" "Buxoro"ga tashrifi oldidan Ashurmatov istefoga chiqarilgandi. Qizig'i, "Surxon"da malum vaqt ishlagan Ashurmatov "Paxtakor"ga qarshi o'yin yaqinlashishi oldidan u erdan ham istefoga chiqarilgandi. SHu tariqa hozircha Arveladze o'zaro to'qnashgan va mag'lub etmagan murabbiy sifatida qolayotgan Ashurmatov qiziq tasodif tufayli "Paxtakor" bilan chempionatda uchrashgani yo'q.

Eslatib o'tamiz, "Navbahor" Superliganing 19-turidan keyin 25 ochko jamg'argan holda turnir jadvalida 7-o'rinda bormoqda. Kuchli uchtalikdagi "So'g'diyona" va "Bunyodkor" bilan oradagi farq 6 ochkoni tashkil qilmoqda. "Paxtakor" esa "Navbahor" ustidan qozonilgan g'alabadan keyin o'z ochkolari sonini 53taga etkazdi va "Loko"ning o'z uyida "Metallurg" bilan durang qayd etishi natijasida o'rtadagi farqni 17 ochkoga oshirdi. "Paxtakor" bu bilan chempionlik uchun katta qadam tashladi. Agarda kelasi turda "Loko" Qo'qonda ochko yo'qotadigan bo'lsa va "Paxtakor" Bekobodda g'alaba qozonsa, unda kelasi turdayoq chempion nomi oydinlashadi. "Lokomotiv" Qo'qonda muvaffaqiyat qozonadigan bo'lsa, unda "Paxtakor" chempionlikni rasmiylashtirishni 21-turga qoldirishi mumkin. Aynan Toshkentda "So'g'diyona"ga qarshi uchrashuv "Paxtakor" uchun chempionlik o'yiniga aylanish ehtimoli yuqori.