"Navbahor": SHevchenko ketdi, Karimov mashg'ulotga qo'shildi

Ertalabki mashg'ulot “Bunyodkor” futbol klubi akademiyasi maydonida o'tkazilgan bo'lsa kechki payt futbolchilar trenajyor zalida shug'ullanishdi. SHu o'rinda bugungi mashg'ulotlarga yangi o'yinchilarni qo'shilganligini aytib o'tish joiz. Tajribali himoyachilardan biri Xayrullo Karimov Toshkentdagi yig'in boshlangach, jamoamiz bilan deyarli birga bo'lsada mashg'ulotlarda qatnashmayotgandi. Bugundan Karimov ham “Navbahor” safida shug'ullanishni boshladi. SHuningdek, jamoamiz tarkibiga oldingi mavsumlarni Qarshining “Nasaf” klubida o'tkazgan darvozabon Alibek Turobov ham qo'shildi. 1993 yilda tug'ilgan ushbu posbon hozircha ko'rikdan o'tmoqda. Bundan bir necha kun oldin murabbiylar shtabidan o'rin olgan Mikola SHevchenko ayni paytda jamoamiz bilan birga emas. Ushbu mutaxassis sog'lig'i bilan yuzaga kelgan muammolar tufayli “Navbahor”da faoliyat olib bormaydigan bo'ldi. 2015 yilgi mavsum so'nggida SHevchenko ko'zini operaciya qildirgach “Metallurg” bilan xayrlashgandi. Oradan malum vaqt o'tgach murabbiyni sog'lig'i yana bezovta qilganligi sababli “Navbahor” lagerini tark etdi. Bugungi mashg'ulot chog'ida tarkibda yana bir yo'qotish bo'lganligini aytib o'tish joiz. Yarim himoyachi G'ayrat Jo'raev jarohat olib yana malum muddatga safdan chiqdi. Yodingizda bo'lsa Jo'raev og'ir jarohatdan keyin o'zining avvalgi sport  formasini tiklayotgandi. Futbolchini oyoq suyagi dars ketganligi bois unga gips qo'yildi.