"Nasaf" ikkinchi o'rinni olsa ham OCHLda o'ynay olmaydi. Bunga kim aybdor?

Kecha AGMK Qo'qonda mag'lub bo'lganidan keyin Qarshining "Nasaf" klubi Bekobodda g'alaba qozonib musobaqa jadvalida ikkinchi o'ringa chiqib oldi.

Ko'pchilikda "Nasaf" Osiyo chempionlar ligasida ishtirok eta oladimi degan savol tug'ilmoqda. Javob: yo'q.

Nimaga deyishingiz mumkin. Sababi "Nasaf" 2021 yil OFK musobaqalarida ishtirok etish uchun licenziyani ololmadi.

Nega ololmadi? CHunki belgilangan muddatda (iyul oyi oxirigacha) klub kerakli hujjatlarni taqdim etmagan.

Bir yo'lini qilsa bo'ladimi? Javob: yo'q, endi kech.

Bunga kim aybor? "Nasaf" klubining o'zi va licenziyalashga javobgar xodim.

Xo'sh, "Nasaf"da qanday kamchiliklar bor? Birinchisi, klub texnik direktorida "A" licenziyasi yo'q. Bundan tashqari OFK talabiga ko'ra licenziya olish uchun klubning xodimlaridan qarzorligi bo'lmasligi shart. "Nasaf"da bu borada ham muammo kuzatilgan.

Nima uchun "Nasaf" oldingi yillarda licenziyani olgan va OCHLda qatnashgan? Sababi u vaqtda klub texnik direktorida (Vitaliy Ni) "A" licenziyasi bo'lgan. Klubning moliyaviy holati ham yaxshi bo'lgan va qarzorlik bo'lmagan.

Xo'sh, unda OCHLda qaysi jamoa qatnashadi? O'zbekistonga OFK 2021 yilgi mavsum uchun 1+1+1 ko'rinishida kvota bergan. CHempion to'g'ridan-to'g'ri guruh bosqichida o'ynaydi. Mamlakat kubogi sohibi OCHL pley-offida o'ynaydi. Agar chempion ham, kubok sohibi ham bitta jamoa bo'lsa u holda chempionatda ikkinchi o'rinni olgan klub pley-offda o'ynaydi. Agar "Nasaf" ikkinchi o'rinni saqlab qolsa undan keyingi jamoa (agar unda OFK licenziyasi bo'lsa) pley-offda o'ynaydi.

2021 yilgi OFK licenziyasini olgan o'zbek klublari quyidagilar: "Paxtakor", "Lokomotiv", "Bunyodkor", "Navbahor", "Metallurg", AGMK va "So'g'diyona".

Yana bir savol tug'iladi: Bitta tashkilotga tegishli bo'lgan klublar OCHLda qanday qilib o'ynay olishadi? PFL bu borada OFKga maxsus xat yo'llagan va OFK bu loyihani batafsil o'rganib chiqmoqda. Biroq bu licenziyalash jarayoni va klublarga licenziya berish uchun hozircha to'siq bo'lolmaydi. OFK bu borada yakuniy qarorni yaqin vaqt ichida O'FA va PFLga yuboradi.

Pley-offda o'ynash uchun eng yaxshi imkoniyat ayni paytda AGMK klubida. Sababi "Bunyodkor" Olmaliq klubidan 10 ochkoga qolib ketgan.

Superligada AGMKga etib olish qiyin lekin, O'zbekiston kubogini yutish orqali AGMKni bemalol ortda qoldirish mumkin. SHunday ekan dekabr oyidagi mamlakat kubogi "Lokomotiv", "Bunyodkor", "Navbahor", "Metallurg" va "So'g'diyona" klublari uchun OCHL pley-offiga chiqish uchun juda ham qulay imkoniyat bo'ladi. AGMK ham kubokni yutishga urinadi, yoki "Paxtakor" kubokni ham, chempionlikni ham qo'lga kiritishini kutadi.

Bizni "qaynoq" dekabr kutmoqda. Issiqroq kiyinib oling.

Narzulla Saydullaev tayyorladi