MTJ. Legionerlarimiz Toshkentga qachon kelishadi?

Samvel Babayan boshchiligidagi jamoa 10 noyabr kuni Toshkentda Iordaniya bilan o'rtoqlik uchrashuvini o'tkazadi. Bu o'yinlarga tayyorgarlik ko'rish maqsadida terma jamoamiz 4 noyabr kuni yig'inni boshlaydi.

Ushbu yig'inga legionerlarimiz qachon qo'shilishlari haqida malumot beramiz.


Igor Sergeev va Egor Krimec ("Beyjing Goan"), Anzur Ismoilov ("CHanchun Yatai")
Xitoy Superligasida 30 oktyabr kuni mavsumning so'nggi tur o'yinlari bo'lib o'tadi. Bu degani bu mamlakatda o'ynaydigan futbolchilar noyabr oyi boshidayoq yurtimizga etib kelishadi va yig'inning boshidanoq jamoa bilan birga bo'lishadi.

Azizbek Haydarov ("Al SHabab")
BAA pro-ligasida o'ynayotgan hamyurtimiz Toshkentga 3 yoki 4 oktyabr kuni kelishi mumkin. Sababi "Al SHabab" 2 noyabr kuni tur o'yinini "Al Ayn"ga qarshi o'tkazadi.

Sardor Rashidov ("Al Jayish")
Rashidov jamoasi ham 2 noyabr kuni Qatar Yulduzlar ligasida o'yin o'tkazadi. SHu bois Sardor Azizbek Haydarov bilan deyarli bir vaqtda Toshkentga kelishi kutilmoqda.

Sanjar Tursunov ("Vorskla")
Agar Samvel Babayan Tursunovni yig'inga chaqirsa hamyurtimiz taxminan 6 noyabr kuni O'zbekistonga keladi. Sababi "Vorskla" 5 noyabr kuni "Karpati"ga qarshi safarda o'yin o'tkazadi.

Aleksandr Geynrix ("Ordabasi")
Qozog'istonda mavsumning so'nggi tur o'yini 29 oktyabr kuni o'tkaziladi. Sasha 6 noyabr kuni Toshkentga keladi.

Odil Ahmedov ("Krasnodar"), Vitaliy Denisov ("Lokomotiv"), Vadim Afonin ("Orenburg")
Legionerlar orasida eng kech keladiganlari Rossiyada o'ynaydiganlari bo'ladi. Vitaliy Denisov o'ynayotgan "Loko" 5 noyabrda "Anji" bilan bellashadi. 6 noyabr kuni "Krasnodar" o'z uyida "Orenburg"ni qabul qiladi. Samvel Babayan agar hujjatlari bilan muammolar hal qilinsa "Orenburg" vakili Vadim Afoninni ham terma jamoaga chaqirishga tayyorligini malum qilgan.