Mirjalol Qosimov: "FIFA kunlari jamoamiz foydasiga ishlamadi"

Unda dastlab OKMK bosh murabbiyi Mirjalol Qosimov ishtirok etdi.

- O'yin bobida yomon harakat qilganimiz yo'q. Futbolda shunaqa, bazan mayda detallar ham ko'p narsani hal qilib ketadi. O'yin boshida tezkor gol o'tkazdik, keyinchalik birinchi taym yarmidan o'tib yana to'p qo'yib yubordik va har ikkala gol biz uchun tushunarsiz bo'ldi. Bu esa raqib jamoaga qo'l keldi. "Neftchi" bilan uydagi o'yinda ham tushunarsiz gol o'tkazib yuborgandik. Bizda vaziyatni o'nglash uchun vaqt bor edi. Masalan, 60-daqiqada Daci to'p kiritganida o'yin tizgini o'zgarib ketishi mumkin edi. Nimayam derdim, "Navbahor"ni g'alaba bilan tabriklayman. FIFA kunlari jamoamiz foydasiga ishlamadi. Hali hammasi oldinda, to'g'ri xulosa chiqarib keyingi o'yinga tayyorgarlik ko'ramiz.

- OKMK jamoasining markaziy himoyachisi Sardor Rahmonov jamoadan ketishi nima bilan bog'liq? 

- Hech narsa bilan bog'liq emas. Sardor bizga ko'p yillar yordam berdi. Lekin futbolda har bir narsaning boshi bo'lgani kabi oxiri ham bor. Rahmonov biz bilan iliq xayrlashib ketdi, bir-birimizga omad tiladik. Bugungi o'yinga va mag'lubiyatga Sardorning hech qanaqa aloqasi yo'q.

- Bilamizki, jamoangiz ko'p o'yinlarda kambek amalga oshirdi. Bugun 2:0dan keyin ham vaziyatdan chiqib ketsa bo'larmidi va bunga nima etishmadi?

- Yana kambek qilishimiz uchun gol etishmadi. Aytib o'tganimdek, agar 60-daqiqada gol urganimizda hammasi boshqacha bo'lardi. Qulay vaziyatdan foydalana olmaslik futbolchilarning asabiylashishiga sabab bo'ladi. Bugungi o'yinda ham shunday bo'ldi.

- O'tgan o'yindagi natija (OKMK - "Sho'rtan" 0:0) bugungi uchrashuvga tasir qildimi?

- Hech qanaqa tasir qilgani yo'q va bugungi o'yinga aloqasi ham yo'q. Chunki bir o'yin boshqasiga tasir qilaversa umuman futbol o'ynab bo'lmaydi. Bugun yutqazdik va buni tezroq unutib 25 iyun kuni bo'ladigan Kubok bahsiga hozirlanishimiz kerak. Biz har bir bahsga yutuqni maqsad qilib chiqamiz. "Navbahor" tezkor gol urgach tempni tushirishga, biz esa aksincha ko'tarishga harakat qildik.

- "Navbahor"ni qanchalik o'rgangan edingiz?

- Biz har bir raqibni o'rganib boramiz, lekin maydonda umuman boshqa narsa tus olishi mumkin. "Navbahor"da Jiyanov, Odilov, Ubaydullaev kabi vaziyat yarata oladigan yaxshi futbolchilar bor. Bugun omad yuz foiz "Navbahor" tomonda bo'ldi deb bemalol ayta olaman.

- Jamoangiz 4ta turdan beri g'alaba qozona olmayapti. Buning sabablari nimada deb o'ylaysiz? 

- Endi har tur kambek qilishning iloji yo'q. O'tgan tur "Sho'rtan" bilan ham vaziyatlar bo'lgandi. Gol urmasang yutmaysan.

- Mavsum boshidagi uchrashuvlarda OKMK o'yindan tashqari holat chizig'ini ushlashni juda yaxshi qo'llab kelayotgandi. Masalan, "Bunyodkor" bilan o'yinda ham shu narsa ko'ringan edi. Lekin qarshi hujumlarda jamoangizda muammolar borligi ko'zga tashlanyapti.

- Buni doim takidlab kelamiz. Bitta maqol bor-ku, ko'rpani o'zingga tortsang narigi tomoni ochilib qoladi. Bu bilan nima demoqchiman, jamoa hujumga chiqsa, himoyada bo'shliqlar yuzaga keladi. Darvozabon yakka o'zi qolib ketishi mumkin. Futbolda har doim hamma joyni to'ldirish mushkul, baribir qaerdir ochiq qoladi. Shunaqa paytda kimdir foydalanib ketishi mumkin.

"Nasaf" bilan ham 1:1 payti faqat yutuqni ko'zlab turgandik. Lekin yo'q joydan Shuhrat Muhammadiev to'pni oldinga tepib yubordi, darvozabonimiz bilan himoyachimiz bir-birini tushunmay qoldi, bundan esa Cheran unumli foydalanib ketdi. Futbol shunisi bilan qiziq. Biz ochiq futbol o'ynaymiz, muxlislarimizga ham katta rahmat, shuncha masofa bosib Namanganga kelib bizni qo'llab turishdi.