Mirjalol Qosimov: Biz tarix yaratdik, tarixni esa o'chirib bo'lmaydi

«Avvalambor Assalomu alaykum. Bugungi o'yin bilan chempionatni yakunladik. Ikkinchi o'rinni qo'lga kiritganimizdan xursandmiz. Nimagaki, biz tarix yaratdik, tarixni esa o'chirib bo'lmaydi. Birinchi navbatda muxlislarga minnatdorchilik bildiraman. Jamoamning futbolchilariga ham rahmat aytaman. CHunki oson yil bo'lgani yo'q. CHempionatimiz shiddatli o'tdi. 

Fursatdan foydalanib, OKMK jamoasi rahbarini o'zim va futbolchilar nomidan ularni tabriklab qolaman. Har doim biz uchun maksimal darajada yordam berdilar. Bugungi g'alabamizni, OKMK kombinatining tug'ilgan kuniga baxshida etaman. O'yinga keladigan bo'lsak, yil davomida oson o'yinlar bo'lgani yo'q.

 Ikki tur yakunida ikkinchi o'rinda bo'lishimizga qaramasdan, to'rtinchi o'ringa tushib ketishimiz ham mumkin edi. Medallarsiz qolishimiz mumkin edi. Futbol kutilmagan natijalarga boy bo'lgani uchun ham millionlar o'yini deb ataladi. Oddiy qilib aytadigan bo'lsak, «Metallurg» birinchi davraning yakunidan so'ng Superligani tark etadi deb taxmin qilishgandi, biroq futbol shunday narsaki, hamma narsa bo'ladi. Hech kim natijalarni oldidan bashorat qila olmaydi. Men ham bu ishni qilishni yoqtirmayman. Barchaga rahmat!», — deb fikrini yakunladi olmaliqliklar ustozi.