Mirjalol Qosimov: "Bashorat qilishni yoqtirmayman"

O'yin haqida

- Nima ham deyish mumkin, yaxshi o'yin bo'ldi. Yarim finalda bir-biriga mos ikki kuchli raqib to'qnash keldi. Tomoshabinlar jangovor ruhdagi qarama-qarshilik guvohiga aylanishdi. Futbolda gol urmasang, yutmaysan.

O'yinni yaxshi boshlagandik, birinchi bo'limga hakam tomonidan qo'shib berilgan daqiqalarda xatoga yo'l qo'ydik. Finalga chiqib shu orqali OCHLga yo'llanmani qo'lga kiritishni maqsad qilgandik. Bugungi o'yinda mezbonlarning g'alabasini 2 nafar himoyachi hal qilib ketdi. Albatta, standartlar borasida ko'rsatma bergandik. Har bir futbolchiga biriktirilganlar bor edi. Ammo, ozgina etiborsizlik sabab gol o'tkazib yubordik. "Nasaf"ni final yo'llanmasi bilan tabriklaymiz, keyingi o'yinlarda omad.

- "Nasaf" bilan ketma-ket ikki bor kubok yarim finalida to'qnash kelayapsizlar. Jamoani qay darajada o'rgangan edingiz va qaysi chiziqlar pand berdi?

- Bu borada aytdim, standart vaziyatlardagi etiborsizlik tufayli gol o'tkazib yubordik. O'tgan o'yinda "Qizilqum" ham aynan standart vaziyatda yo'l qo'ygan xatomizdan foydalanib ketgandi. "Nasaf"da Aliqulov, Eshmurodov kabi futbolchilar bunday vaziyatlarda juda yaxshi ishlashadi.

- Sizningcha, ertangi o'yinda kim finalga chiqadi?

- Bu men eng yomon ko'rgan savol. Bashorat qilishni yoqtirmayman. Siz yoki mening aytganim bo'lganida hozir finalga chiqqan bo'lardik.