Mirabror Usmonov: "Agar olimpiya terma jamoamiz oldidagi vazifa bajarilmasa, Markazdagi hamma ishdan ketadi"

Taqdirlash marosimidan oldin O'FF prezidenti Mirabror Usmonov savollar bo'lsa, marhamat, deya OAV vakillariga yuzlandi. SHunda mening savolim quyidagicha bo'ldi:

"Malumki, olimpiya terma jamoamiz oldiga 2016 yil Rio-de-Janeyroda bo'lib o'tadigan Olimpiada o'yinlariga borish vazifasi qo'yilgan. Biz futbol bo'yicha hali Olimpiada o'yinlarida ishtirok etmaganmiz, shu bois xalqimiz ushbu vazifa bajarilishini intizorlik bilan kutmoqda. Ammo olimpiya terma jamoasiga bosh murabbiy etib tayinlangan Baxtiyor Ashurmatov bir paytning o'zida "Navbahor"ni ham boshqaryapti. Siz bu masalaga qanday qaraysiz? Ikkita jamoani boshqarish murabbiyga og'irlik qilmaydimi? Balki Ashurmatovni to'liq olimpiyachilarga javobgar qilib qo'ygan maquldir?"

Bu savolga Mirabror Zufarovich quyidagicha javob qaytardi:

"Yaqinda barcha terma jamoalarga javobgar murabbiylar shtabini tashkil qildik. Bundan tashqari, bizda Terma jamoalar markazi ham faoliyat yuritib kelmoqda. Markaz yaxshi ishlab, terma jamoalarimiz turli musobaqalarda muvaffaqiyatli ishtirok etishi uchun har yili 10 milliard so'mdan ko'proq mablag'ni berib kelyapmiz".

"Mana endi ulardan ham natija so'raydigan payt keldi. Agar olimpiya terma jamoamiz 2016 yil bo'lib o'tadigan Olimpiada o'yinlariga bora olmasa, nafaqat Ashurmatov, balki Terma jamoalar markazidagi hamma ishdan ketadi. Bu gap ayniqsa professor Rustam Akramov, markaz rahbari Asqar Tolibjonov, shuningdek murabbiylar shtabida ishlayotgan boshqalarga ham taalluqli".

"Ammo ikkinchi tomondan "Navbahor"ni ham o'z holiga tashlab qo'yishga ko'zim qiymayapti. Ashurmatov o'tgan bir yil ichida u erda yaxshi jamoani shakllantirdi. Va nasib qilsa, ikki yildan keyin "Navbahor" oliy ligada 4-5 o'rinlar uchun kurashadigan jamoaga aylanadi. SHu bois Baxtiyor Ashurmatovning hozircha ham klubda, ham terma jamoada ishlashini maqul ko'rdik. Lekin vazifa uddalanmasa, aniq ishdan ketadi".

X.Xoliqov.