"Metallurg": Jamoa ertaga Andijon safariga jo'naydi

Ayni paytda jamoa azolari CHirchiq shahrida bo'lajak uchrashuvga qizg'in tayyorgarlik ko'rishmoqda. CHempionat yakuniga etgan sari o'yinlar yanada murosasiz, qizg'in tus olmoqda. Barcha klublarga ochko suv va havodek zarur bo'lib turgan bir paytda ayniqsa autsayderlarga qarshi o'yin og'ir kechishini bekobodliklar yaxshi bilishadi. SHu boisdan ham murabbiylar har kuni ikki mahaldan mashg'ulotlarga zo'r berishmoqda. Murabbiylar qo'l ostidagi o'yinchilarning barchasi bo'lg'usi uchrashuvda maydonga tushishga tayyor. Faqatgina O'zbekiston U-19 jamoasiga jalb etilgan Islomjon Qobilov hamda Javohir Esonqulovlardan tashqari. Jasur Abduraimov rahbarligidagi termada I.Qobilov har ikkala o'yinda maydonga tushgan bo'lsa, J.Esonqulov Avstraliyaga qarshi kechgan o'yinning ikkinchi taymida zahiradan maydonga tushdi.

Mazkur jamoalar bugungacha 33 ta uchrashuv o'tkazishgan va shulardan 14 tasida "Metallurg", 11 tasida "Andijon" jamoasi g'alaba qozongan. 8 ta o'yinda esa kuchlar teng kelgan. Kritilgan va o'tkazib yuborilgan to'plar farqi - 59:51, bekobodliklar foydasiga. Jamoalarning birinchi davrada Bekobodda o'tkazilgan o'yinida mezbonlar 3:1 hisobida g'alaba qozonishgandi. Murodjon Toshmatov, Dilmurod Karimov hamda Zohid Abdullaevlar tomonidan kiritilgan gollarga Islombek Isoqjonov bitta aniq zarbasi bilan javob qaytargandi.

Ayni paytda "Metallurg"ning asosiy tarkibi 42 ochko jamg'argan holda musobaqa jadvalida 5-o'rinni egallab turgan bo'lsa, yoshlar tarkibida 44 ochko bor va ular "Paxtakor", "Navbahor" yoshlari bilan ikkinchi-to'rtinchi o'rinlarni bo'lashib turishibdi.

Andijondagi uchrashuvni oliy toifali hakam Hasan Ro'ziev boshqarib boradi. Unga qanotlarda Olim Abduvosilov hamda Nabijon Ro'zievlar yordam berishadi. Zahiradagi hakam Anatoliy Rubakov, hakamlar brigadasining barchasi Toshkent shahridan. Hasan Ro'ziev bu yilgi mavsumda “Andijon” ishtirokidagi ikkita uchrashuvni boshqargan. Safarda o'tkazilgan o'yinlarning birinchisida “Andijon” “Qizilqum”ga 1:2 hisobida boy berib qo'ygan bo'lsa, Farg'onada “Neftchi”ga qarshi kechgan o'yinda 2:1 hisobida g'alaba qozongan. “Metallurg” esa bu hakam boshqaruvida Jizzaxda “So'g'diyona”ga qarshi kechgan uchrashuvda durang o'ynagan – 0:0.


Andijon (Andijon) – Metallurg (Bekobod)
Hakamlar: H. Ro'ziev (Toshkent), O. Abduvosilov (Toshkent), N. Ro'zimov (Toshkent), A. Rubakov (Toshkent)
Nazoratchi: A. Arutyunov (Toshkent).
O'zPFL vakili: G. Rtveladze.