Messining o'rnini bosishi kutilgan Deulofeu hozir qaerda?

Bazilarning o'rnini to'ldirish imkonsiz. Masalan, futbol so'nggi 10 yilda minglab "yangi Messi"larni ko'rdi. Biroq, yuqorida aytilganidek, Leoni takrorlash mumkin emas, u bitta. 

Ruknimizning avvalgi sonlarida Alen Halilovich va Boyan Krkich haqida malumot bergandik. Bugun navbat katalon o'g'loni Jerar Deulofeuga etdi. Zero, aynan u "Barselona"da Messi erasining davomchisi bo'lishi kutilgan edi.

1994 yilda tug'ilgan Jerar 9 yoshida "Barsa" kanterasiga qabul qilindi. Keyinchalik qanot vingeriga aylanib ketgan futbolchi bolalar va o'smirlar futbolida hujumchi ortida pleymeykerlik qilardi. Iqtidori murabbiylarning ko'ziga ancha erta "suqila" boshlagan Deulofeu Ispaniyaning barcha yoshdagi terma jamoalarida etakchilardan biri edi.

"Barsa" libosida ilk golini urganida atigi 17 yoshda edi. SHu tufayli jurnalistlar uning timsolida ham yangi Messini topishdi. Mana, oradan roppa-rosa 10 yil o'tdi. O'zbek xalqining "maqtalgan qiz" haqidagi maqoli yana bir bor tasdig'ini topdi. Statistikaga qarasak, Jerar ortda qolgan dekadada "ko'k-anorrangli" libosni atigi 23 bor kiygani va bor-yo'g'i 2 golga mualliflik qilganiga guvoh bo'lamiz (bo'lajak Messi emish). 

Katalon klubi muxlislari Deulofeuning ortda qolgan yillarda "Everton", "Sevilya", "Milan", "Utford" singari klublarda to'p tepganini yaxshi bilishadi. 27 yoshli vinger joriy yilning yanvarida Italiya A Seriyasiga ko'chib o'tdi. Unda Udine shahrining "Udineze" klubi bilan 2024 yilning yoziga qadar mo'ljallangan shartnoma bor.

So'zimiz oxirida Jerarning o'zini Messi bilan solishtirishlariga munosabatini keltirmoqchimiz. U 2018 yilda bu masalaga alohida to'xtalgan edi: "Yosh bolaning Messiga qiyoslanishi tashqi tomondan yoqimlidek tuyulishi mumkin. Ammo, bu juda dahshatli holat. OAV har kuni meni "yangi Messi" deb yozar, u bilan qiyoslardi. Bunday bosimga chidash g'oyat mushkul".