Lutfullo To'raev: "Osiyo chempionatiga borish har bir futbolchining orzusi"

"Osiyo chemipionatiga borish har bir futbolchining orzusi. Buning uchun mashg'ulotlarda hamma birdek ishlayapti, kim ham Osiyo Kubogiga borishni istamaydi? Agar turnirda ishtirok etsam va terma jamoaga foydam tegsa, men bundan faqat xursand bo'lar edim", - deydi "Lokomotiv" futbolchisi.



- Ikkinchi yig'indan kelib chiqib jamoa o'z formasiga kirib oldi deb o'ylaysizmi?
- Jismoniy tayyorgarlikka katta etibor qaratildi va futbolchilar barcha ko'rsatmalarni imkon qadar to'liq bajarishga erishdilar. Osiyo Kubogiga yana bir necha kun bor, mana shu kunlardan ham unumlif foydalansak, hammasi joyida bo'ladi.

- 4-3-3 taktikasi sizga qanchalik mos tushyapti va jamoa buni qanday uddalayapti deb ayta olasiz?
- Bugun bu jahon amaliyotida sinalgan taktika. Ayni paytdagi futbolchilarimizning salohiyatidan kelib chiqsam, bu taktikaga bizning futbolchilarga mos tushyapti deb aytgan bo'lar edim.



- Ayni paytda shug'ullanayotgan futbolchilar orasidan 3 nafari musobaqaga bora olmaydi. Siz esa, aynan raqobat eng kuchli bo'lgan nuqta vakilisiz...
- To'g'ri gapingiz, bunday paytda murabbiy musobaqaga yaqin qolgan vaqtda kim tayyor bo'lsa, o'shani yakuniy tarkibga kiritadi. Bu borada hamma murabbiyning qarorini hurmat qiladi. Boisi, barchaning maqsadi bitta, terma jamoamizning muvaffaqiyat qozonishi.

- Deylik, Siz  Osiyo Kubogidasiz, o'z formangizni bilgan holda, u erda qatnashishga tayyorman deb o'ylaysizmi?
- Tayyorman! Vatan uchun o'ynashni hamma ham istaydi, undan keyin Osiyo chempionati, bu JCH saralashi uchun poydevor degani. Futbolchi o'ziga beriladigan har qanday unumli imkoniyatdan foydalanib qolishi kerak.


Nodirxo'ja Yuldashev
Dubay