Kitobda “Nasaf” FM filiali ish boshladi

Vohaning turli tumanlaridagi futbol maktablarida bugungi kunda yosh avlodning sog'lom unib o'sishi, shuningdek kelgusida etuk futbolchilarni etkazib berish borasida uzluksiz ishlar olib borilmoqda.

“Sog'lom bola” yilida “Nasaf” futbol maktabi mamuriyati yana bir savobli ishga qo'l urdi. So'lim Kitob tumanidagi yosh futbolchilarga futbol sir-asrorlarini o'rgatish va kelajakda “Nasaf” futbol klubining kadrlar bazasiga zamin yaratish maqsadida ushbu tumanda “Nasaf” akademiyasining filiali ochildi.

11 may kuni bo'lib o'tgan ochilish marosimida Kitob tuman hokimi, tuman futbol federaciyasi prezidenti Uzoq Xudoyqulov tuman xalqini ushbu xayrli ish bilan qutlab, kelajakda Qashqadaryo, qolaversa O'zbekiston nomini dunyoga tanitadigan futbolchilar ushbu maktabdan etishib chiqajagiga ishonch bildirishini aytib o'tdi. SHundan so'ng sahnaga “Nasaf” PFK bosh menejeri SHamil Yarulin, bosh murabbiy Ro'ziqul Berdiev, sport direktori Vitaliy Ni, “Nasaf” futbol maktabi direktori Sergey Kucherenko, O'zbekiston terma jamoasi azolari SHohruh Gadoev hamda Eldorbek Suyunovlar tashrif buyurishdi. Futbol maktab filiali ramziy ochilish lentasini Uzoq Xudoyqulov, Ro'ziqul Berdiev, SHamil Yarulin va Sergey Kucherenko kesishdi va mehmonlar filial tarbiyalanuvchilari bilan esdalik uchun suratga tushishdi. SHundan so'ng SHamil Yarulin yig'ilganlarni bayram bilan qutlab, tumanda rahbarlar futbolni sevishini ko'rib yana bir bor xursand bo'lganini qayd etib o'tdi. Asli Kitob farzandi bo'lgan Ro'ziqul Berdiev esa orzularidan yana biri ushalayotganini takidlab, shunday dedi:

-Qadrli tumandoshlarim, qadrdonlarim! Men bugungi tadbirda ishtirok etayotganimdan judayam xursandman. Tumanimiz futboli rahbarlariga, shuningdek “Nasaf” jamoasi rahbarlariga rahmat, deb qolaman. Bu qilinayotgan ishlar barchasi kelajakda, albatta, o'z mevasini beradi. Bugungi bayram bilan barchani tabriklayman.

Tadbir davomi sifatida davlatimiz madhiyasi sadolari ostida Qashqadaryo viloyat Ikkinchi ligasi mavsumning ochilishi doirasida Respublika bayrog'i ko'tarildi. Birinchi tur uchrashuvida bahs olib borish uchun maydonga Kitobning “Neftchi” hamda Muborakning “Mashal-98” jamoalari tushib kelishdi. Tashkilotchilar tomonidan ikkinchi liga futbolchilariga maxsus sovg'alar topshirildi.

Saytimiz nomidan “Nasaf” futbol maktabining filialiga kelgusida omad tilab qolamiz. O'zbek futboli yo'lida qilinayotgan har bir xayrli ishlarga rivoj tilaymiz!

Olim TOLIPOV.