KAMERUN - XORVATIYA 0:4. MATNLI TRANSLYACIYA

Kamerun - Xorvatiya 0:4
19 iyun. 03:00
Bosh hakam: Pedro Proensa (Portugaliya)
Yordamchi hakamlar: Bertino Miranda (Portugaliya), Xose Trigo (Portugaliya)
Zaxira hakami: Uolter Lopez (Guatemala)

Gollar: Olich (11), Perishich (48), Manjukich (62, 73)

Kamerun: Itanje, Assu-Ekoto, Nkolou, Song, Mukanjo, Abubakar (Vebo, 70), CHupo-Moting (Salli, 75), CHejou (Noenku, 46), Mbia, Enox, Matip.

Xorvatiya: Pletikosa, Pranich, Perishich (Rebich, 78), CHorluka, Rakitich, Lovren, Modrich, Srna, Manjukich, Olich (Eduardo, 69), Samir (Kovachich, 72).

Ogohlantirish: Eduardo (90)

CHetlatish: Song (40).
 
                            MATNLI TRANSLYACIYA
                                       YANGILASH



UCHRASHUV YAKUNLANDI! XORVATIYA G'ALABA QOZONDI!

90` Kamerunlik futbolchilar o'zaro kelishmay qolishdi. Assu-Ekotto jamoadoshiga "kalla" qo'ymoqda! O'ZINGNI BOSIB OL! Nimalar qilmoqda bular bugun?

90` Uchrashuvga 2 daqiqa vaqt qo'shib berildi. Qo'ib berilmasa ham bo'lardi..

90` Eduardo sarik kartochka ishlab oldi.

89` Kamerunning hujumi! Bu safar endi afrikaliklar gol ura olishmadi.

88` Nimalar qilmoqda bo'lar-a? Gol ur! Nahotki gol emas? Rebich va Rakitich deyarli darvozabon bilan yakkama-yakka qolishgan edi. Ammo Rakitichning zarbasi darvozaga kirmadi.

87` Jamoalar yurib futbol o'ynashmoqda. Ortiqcha harakatlarsiz. Lekin shunday bo'lsada Xorvatiya xavfli hujumlarni tashkil eta olmoqda. Lekin yakuniy zarbani ancha chuzib yuborishmoqda.

85` Mukenjada qanday imkoniyat! Kamerun hisobni qisqartirish uchun yaxshi vaziyatga ega bo'lgan edi.

84` Kamerun taqdirga tan berdi. Xorvatiya esa ishtiyoqsiz hujumlar tashkil etmoqda. Boshqa gol urgisi kelmayotgandek.

82` Xorvatiyaning navbatdagi hujumlari. Eduardo qulay imkoniyatdan foydalana olmadi.

80` Xorvatiya istaganicha hujumlar tashkil etmoqda gollar kiritmoqda. Aleksandr Songning qilgan xatosi jamoasi uchun anchagina qimmatga tushmoqda. Yo'q joydan qizil ishlab olgani chakki bo'ldi ushbu futbolchini.

78` Xorvatiya tarkibida so'nggi o'zgarish. Ivan Perishich o'rniga Rebich maydonga tushdi.

75` Kamerun tarkibida o'zgarish. CHupo-Moting maydonni tark etdi. Uning o'rniga Edgar Salli maydonga tushdi.

73` GOOOOOOOOOOOOOOOOOOOOOOOOL! MARIO MANJUKICH! Eduardoning darvoza tomon yo'llagan zarbasini Itanje qaytardi. Lekin qaytgan to'pni Mario Manjukich bo'sh qolgan darvozaga qiyinchiliksiz kiritdi va hisobni yanada yiriklashtirdi!

72` Xorvatiya tarkibida o'zgarish. Samir o'rniga Kovachich tushdi.

70` Vinsent Abubakar o'rniga Pierre Vebo maydonga tushdi.

69` Ivica Olich maydonni tark etmoqda. Uning o'rniga Eduardo maydonga tushirildi.

68` Xorvatiya deyarli o'yin taqdiri hal etdi. Buyog'iga bemalolchilik.

66` Kamerun oldinda bordi va hujum tashkil etdi. Lekin ularning hujumlari samarasiz yakunlandi. Xorvatiya esa tezda qarshi hujumda o'ynadi. Perishichga bu vaziyatda biroz tezlik va aniqlik etishmadi. Aks holda hisob yanada yiriklashishi mumkin edi...

64` Xorvatiya bugun mahorat evaziga raqibini engmoqda. Niko Kovach jamoasi juda aqlli va tartibli futbol ko'rsatishmoqda.

62` GOOOOOOOOOOOOOOOOOOOOOOOOOOOOOOO! MARIO MANJUKICH! Daniel Pranichning burchakdan etkazib bergan to'pini Mario Manjukich boshi bilan darvozaga joylab qo'ydi, 0:3!

61` Olich, Manjukich va Perishich bugun Kamerun himoyasini ancha ishlashga majbur qilishmoqda.

59` Jamoa sardori darvoza tomon zarba yo'lladi. Jonli devordan o'tgan to'p darvozaga aniq bormadi.

58` Xorvatiya xavfli nuqtadan jarima zarbasi ishlab oldi. Perishichga nisbatan qoida buzilgan edi. To'p oldida Rakitich, Srna, Perishich.

56` Xorvatiya hujum tashkil etdi. Srna va Modrichning faolligi evaziga yuzaga kelgan burchak to'pidan unumli foydalana bilishmadi.

54` Kamerun taslim bo'lmoqchi emas. Kurashmoqda. Hali vaqt borligini ular juda yaxshi tushunib turishibdi.

52` Hozirgina maydonga tushgan Neonkuning kuchli zarbasi xavfli ko'rinish oldi!

50` MARIO MANJUKICH! Xorvatiya jonlandi! Mario Manjukich darvozabon bilan birga-bir chiqib bordi va zarba yo'lladi. Lekin zarbaga biroz anilik etishmadi. Hisob yiriklashishi mumkin edi-ya...

48` GOOOOOOOOOOOOOOOOL! Perishich! Qoyil, Perishich! Ivan to'pni maydon markazi oldida raqibidan olib qo'ydi va chap qanotdan raqib jarima maydonchasi ichiga kirib bordi va hisobni 0:2ga etkazdi!

47` Kamerun tarkibida o'zgarish ruy berdi. CHejou o'rniga Noenku maydonga tushdi.

46` Ikkinchi bo'lim boshlandi!

Birinchi bo'lim tugadi. TANAFFUS! Dam olamiz!

45` Abubakarning zarbasiga biroz aniqlik etishmadi.

45` Birinchi bo'limga 1 daqiqa vaqt qo'shib berildi.

44` Folker Finkening tanaffusda qiladigan ishi ko'paydi. Songni o'rnini to'ldirish va hisobni tenglashtirish uchun u rejalar tuzib chiqishi kerak bo'ladi. Aleksandr Songga esa tegishli choralar ko'rilsa kerak. Har holda jamoasini bir kishi kam qoldirib ketdi ushbu futbolchi.

42` Song hozir Pepeni ishini takrorladi. Balki undanam yomonrog'ini. O'zi shundog'am jamoasi yutqazib turganda-ya?

40` BABAH! QIZIL KARTOCHKA! CHETLATISH! SONG vaziyat qahramoni! Tushunmadim, nega hozir to'psiz yugurib ketayotgan Manjukichni Song urdi? Nega? O'tgan yilgi "7:0" uchunmi? Song hozir Kamerunni qiyin vaziyatda qoldirib ketmoqda.

39` Matip Xorvatiya himoyasini bezovta qilib ko'rdi. Lekin uning bu harakatlaridan Kamerun jamoasi uchun naf chiqmadi.

37` Ivan Perishich burchak to'pidan so'ng boshi bilan darvoza tomon zarba yo'lladi. Xavfli, ammo noaniq.

36` Itanje yo'q joydan raqiblariga burchak to'pi tepish huquqini taqdim etmoqda. Qoyil-e!

35` Mbia hozir raqib jarima maydonchasi tomon kirib keldi. Lekin so'nggi pallada uning yo'liga himoyachi tug'anoq bo'ldi.

34` To'p bilan muomalada bo'lish bo'yicha hozircha tenglik. Ellikka-ellik!

33` Mario Manjukich! Jarimadan uzatilgan to'pni oyog'i bilan darvozaga yo'llamoqchi bo'ldi. Lekin uning zarbasi o'xshamadi va kamiga o'yindan tashqari holatda qolib ketgan ekan.

30` Xorvatiya sardori Dario Srnaga tibbiy yordam ko'rsatilmoqda. O'yinda biroz to'xtalish.

28` Samuel Eto`O o'rniga tushgn Abubakarning ishlari hozircha yurishmayapti. Xorvatiyalik himoyachilar ushbu futbolchiga imkon berishmayapti. Abubakar esa taslim bo'lmoqchi emas, u harakatlanishda davom etmoqda. Bu safar bo'lmasa, boshqa safar deb...

26` Ivica Olich Kamerun darvozasi tomon shunaqangi zarba berdiki, bu to'p darvozadan ancha naridan o'tib ketdi.

25` Zerikib qolmadingizmi? Aytishlaricha, bu o'yinda hali yana ko'p gollar kiritilishi mumkin ekan.

23` Kamerun yana burchak to'pi ishlab oldi. Lekin Assu-Ekotoning jarima maydonchasi tomon uzatib bergan to'pi sheriklarigacha etib kelmadi.

21` Xorvatiya kam hujum qilmoqda. Lekin ularning urinishlari ancha xavfli tus olmoqda. Kamerun ko'proq oldinga bormoqda, ammo raqib darvozasi tomon xavfli zarbalar etishmayapti. Hujumlarining yakuni yo'q.

19` Kamerun dastlabki daqiqadardayoq gol urish uchun intildi, yugurdi. Lekin Xorvatiya gol urdi. SHunga aytishadida, "yugurganniki emas, buyurganniki" deb.

17` Xorvatiya uchrashuvdagi tashabbusni o'z qo'liga oldi. Sal qolsa Kamerun ikkinchi golni o'z darvozasidan olib chiqardi.

15` Ha, aytganday. Saytimizning "kros/roys" yuzeri uchrashuv oldidan berilgan savolga to'g'ri javob berdilar va Toshkent "derbisi"ga chipta yutib oldilar. Yani "Paxtakor" - "Bunyodkor" bellashuviga.

13` Kamerunnig faolligi emas, Xorvatiyaning aqlliligi uchrashuv debyutida ish berdi. Kamerun hujumga berilib ketdi, lekin Xorvatiya gol urdi.

11` GOOOOOOOOOOOOOOOOOOOL! OLICH! Xorvatiya birinchi xavfli hujumidanoq Kamerun darvozasini ishg'ol eta oldi. Bundesliga jamoasi "Volfsburg" futbolchilari Perishich va Olich hozir Xorvatiyaga muhim golni taqdim etishdi. Perishich Ivica tomon to'pni uzatib berdi va Olich ochiq darvozaga qiyinchiliksiz to'pni to'g'irlab qo'ydi, 0:1!

10` Xorvatiya sekin-asta hujumga o'tmoqda. Lekin hozircha faollik ko'rinmayapti. Bugun xorvatlar asosan ikkinchi qavat orqali, Manjukichga ishonib harakat qilishlari kerak.

9` Kamerun ancha faollik bilan o'yinni olib bormoqda. TVda hozir Eto`Oni ko'rsatishdi. O'tiripti zaxira o'rindig'ida. Balki ikkinchi bo'limda tushib qolar.

8` Nihoyat Xorvatiya ham hujum qilib ko'rdi. Lekin ularni o'ylagan rejasi amalga oshmadi.

7` Ushbu xavfli vaziyatni ham xorvatiyalik himoyachilar bartaraf eta olishdi.

6` Hujumlar bilan boshlangan o'yin, hujumlar bilan davom etmoqda. Yomon emas. Kamerun yana jarima zarbasi ishlab oldi. Yanada xavfli nuqtadan. UHHH!

5` Burchak to'pidan so'ng kamerunlik futbolchilar jarima maydonchasi ichida qoidani buzishdi deb topdi uchrashuv bosh hakami Pedro Proensa.

4` Xorvatiya himoyasi bu standart vaziyatini bartaraf etdi. Endi burchak to'piga navbat.

3` Mukanju o'z qanotidan faollikni boshladi. Unga qarshi qo'pollik ishlatildi. Jarima to'pi. Xavfli bo'lishi mumkin...

2` Kamerun yomonku-a? Boshlanishidan oldinga otlanishdi! Mukanju o'tkir burchakdan Pletikosa darvozasini ishg'ol etmoqchi bo'ldi. Lekin zarba noaniq.

1` Uchrashuv boshlandi! Har ikkala jamoaga omad tilagan holda biz ham boshladik!

Futbolchilar o'yin oldi so'nggi so'zlarini bir-birlariga aytib olishmoqda.

O'yin boshlanishiga hamma narsa shay... Sizchi, tayyormisiz?

Endi Xorvatiya davlat madhiyasiga navbat etibkeldi...

Kamerun davlat madhiyasi jaranglamoqda...

Jamoalar maydonga chiqib kelishmoqda...


Kechagi sharhimda Rossiya - Janubiy Koreya o'yinidagi ilk gol muallifi qaysi futbolchi bo'ladi degan savolni bergan edim. Lekin hech bir yuzer kechagi uchrashuvdagi birinchi gol muallifini topa olishmagandi. Bugungi o'yin oldi ham aynan shu savol bilan murojaat qilmoqchiman. Kamerun - Xorvatiya bellashuvida qaysi futbolchi hisobni ochadi? To'g'ri topgan yuzerga Toshkent "derbisi"ga chipta bor. Faqat bitta variant qabul qilinadi.

Ushbu bahsda kim mag'lubiyatga uchrasa, o'sha jamoa Ispaniya va Avstraliya kabi mundialni erta yakunlashga majbur bo'ladi. SHu boisdan ham bugungi o'yin juda qiziqarli va keskin kurashlarga boy o'tishi tabiiy.

Uchrashuv boshlangunicha nima qilsam ekan deysizmi? Narigi bo'limda Ispaniya - CHili uchrashuvidagi eng sara fotolavhalar joylashtirilgan, bemalol kirib tomosha qilishingiz mumkin.

Assalomu aleykum qadrli futbol ishqibozlari! Jahon chempionatining navbatdagi qiziqarli bahsini ko'rishga tayyormisizlar? Sensaciyalar, kutilmagan o'yinlar va chiroyli gollarni ko'rish yoqimli-a? Demak navbat  Kamerun - Xorvatiya uchrashuviga! Bu o'yinning matnli translyaciyada kamina SHahboz Beg'amov ishlaydi.

- Bahs soat 03:00da boshlanadi.