Jismoniy tarbiya va sport vazirligi barcha vazirlik, idora va tashkilotlarning markaziy apparati xodimlarini sog'lom turmush tarziga chorlaydi

Malumki, O'zbekiston Respublikasi Prezidenti tomonidan 2018 yil 20 sentyabr kuni jismoniy tarbiya va sport sohasini rivojlantirish masalalariga bag'ishlab o'tkazilgan yig'ilish, qolaversa 2019 yil 19 mart kuni o'tkazilgan “Yoshlar bilan ishlashni samarali tashkil etishda madaniyat, sanat, sport, axborot texnologiyalari, kitob o'qishga qiziqishini oshirish bo'yicha 5 ta muhim tashabbusni amalga oshirish to'g'risida”gi videoselektor yig'ilishida belgilab berilgan ustuvor vazifalar ijrosini taminlash maqsadida vazirlik, idora va tashkilotlar miqyosida sportni keng ommalashtirish chora-tadbirlari amalga oshirib kelinmoqda.

Jumladan, O'zbekiston Respublikasi Jismoniy tarbiya va sport vazirligi tashabbusi bilan joriy yilning oktyabr-noyabr oylarida barcha vazirlik, idora va tashkilotlar (huquqni muhofaza qilish organlaridan tashqari)ning markaziy apparati xodimlari o'rtasida futbol va voleybol bo'yicha “Mustaqillik kubogi” sport musobaqalarini tashkil etish va o'tkazish rejalashtirilmoqda.

Loyihaga ko'ra erkaklar futbol musobaqalarida, ayollar esa voleybol musobaqalarida g'oliblik uchun o'zaro bahslashadi. Musobaqa Nizomiga ko'ra ishtirokchilarning yoshi chegaralangan, yani musobaqalarda faqat 30 yosh va undan yuqori bo'lgan xodimlar qatnashish huquqiga ega.

Musobaqaning final bosqichi sport bayrami tarzida tashkil etilib, yakunda barcha g'olib va sovrindorlar tashkilotchilar tomonidan qimmatbaho esdalik sovg'alari bilan taqdirlanadi.

Jismoniy tarbiya va sport vazirligi matbuot xizmati