Jahongir Jiyamurodovdan xayrli ish

U bo'sh vaqtini bekorga o'tkazmayapti. Ayni paytda xayrli ishlarga qo'l urgan. J.Jiyamurodov o'zi tug'ilib o'sgan Sirdaryo viloyati Mirzaobod tumanidagi Birlashgan mahalla fuqarolar yig'ini hududida suniy qoplamali mo'jazgina futbol maydonini barpo etgan. Takidlash joizki, har kuni mazkur o'yingoh havaskor futbolchilar bilan band bo'ladi. Jahongir Jiyamurodov tashabbusi bilan "9 may – Xotira va qadrlash kuni" bayramini munosib kutib olish maqsadida bu erda futbol turniri bo'lib o'tdi. Unda 2006-2007 yilda tug'ilgan o'smirlardan iborat 10ta jamoa g'oliblik uchun kurash olib borishdi.  Barcha uchrashuvlarni ko'tarinki kayfiyatda o'tkazgan Ipakchilik mahallasi jamoasi (murabbiy – Umid Mamarahimov) bosh sovrinni qo'lga kiritishdi. Qolgan sovrinli o'rinlar – Bahor va Yangi hayot jamoalariga nasib etdi. Musobaqaga taklif etilgan mehnat faxriylari, ikkinchi jahon urushi front-orti faxriylari, afg'on urushi qatnashchilari, mahalla faollari g'olib va sovrindorlarni munosib qutlashdi. 

– Guvohi bo'lganingizdek, hamma o'yinlar juda keskin va murosasiz tarzda o'tdi. Jamoalar safida bir qator iqtidor egalari borligi kuzatildi. Bularga har tomonlama qo'llab-quvvatlashimiz, futbol bilan shug'ullanishlari uchun imkon qadar zarur shart-sharoitlar yaratib berishimiz kerak. O'ylaymanki, mazkur turnir ananaviy bo'lib qoladi. Kelgusida qo'shni viloyatlardan ham jamoalar taklif qilishni rejalashtirganmiz. Asosiy maqsad – yangi nomlarni izlab topish va kashf etishdan iborat, - dedi biz bilan suhbatda J.Jiyamurodov.