Ixeroume Uche: "Eronning o'rnida O'zbekiston bo'lishi kerak edi"

Markaziy o'yinlardan biri Angliya va Urugvay terma jamoalari o'rtasida bo'lib o'tadi. Kim biladi, balki bugun yana bir nomdor terma jamoa bilan xayrlasharmiz? SHuningdek, dastlabki turda g'alaba qozongan Kotd`Ivuar va Kolumbiya terma jamoalarining o'zaro o'yiniga ham qiziqish yuqori. Dastlabki turda mag'lubiyat alamini totib ko'rgan Yaponiya va Greciya terma jamoalari o'yini ham ancha shiddatli o'tishi kutilmoqda.

Biz bugungi o'yinlar oldidan Paxtakor jamoasining sobiq nigeriyalik hujumchisi, bir necha yildan beri Vetnam chempionatida to'p tepib kelayotgan Ixeroume Uche bilan bog'lanib, uning fikrlari bilan qiziqdik.

- Uche, salom. JCH-2014 o'yinlarini ko'rib boryapsizmi?
- Albatta. Har bir uchrashuvni katta qiziqish bilan tomosha qilyapman. Ayniqsa, Nigeriya terma jamoasining o'yinini intiqlik bilan kutyapman. Tabiiyki, birinchi navbatda o'z vatanim jamoasiga muxlislik qilaman. Afsuski, start unchalik ham o'xshamadi. Eron bilan bo'lib o'tgan o'yinda osiyoliklar darvozasiga yo'l topa olishmadi. O'zi aslida Eronning o'rniga O'zbekiston terma jamoasi jahon chempionatiga borishi kerak edi. O'ylaymanki, keyingi ikki o'yinda vaziyatni ijobiy tomonga o'zgartirishadi.   

- Bugungi uchrashuvlardan nimalarni kutyapsiz?
- Bugun Yaponiya va Kolumbiya terma jamoalari g'alaba qozonishadi. Angliya va Urugvay o'yinida esa g'olib aniqlanmaydi, yani durang natija qayd etiladi.

- Hisob qanday bo'lishini taxmin qilyapsiz?
- Bashorat qilishni yoqtirmayman, chunki hamisha ham to'g'ri chiqmagan. SHunday bo'lsada, taxminimni aytaman. Kolumbiya  Kotd`Ivuar - 2:0, Yaponiya  Greciya - 2:0. Urugvay  Angliya - 1:1.

- Ispaniyaning ketma-ket ikki mag'lubiyati va buning natijasida guruhning o'zida qolib ketayotganini siz ham hazm qila olmagan bo'lsangiz kerak?
- Bo'lmasamchi. Amaldagi jahon chempionlarining bu tarzda mundialni tark etishlarini hech kim kutmagandi. SHu jumladan, men ham. Nachora, bu futbol. U esa shunisi bilan qiziq. SHaxsiy fikrim, Ispaniya terma jamoasining o'yinini raqiblar yaxshigina o'zlashtirib olishgan.   

Kamoliddin ALIMOV suhbatlashdi