Ilhom SHaripov: "Peshqadam ekanligimiz hali hech narsani anglatmaydi"

- O'yin borasida fikrlaringiz?

- Havo harorati ancha issiq bo'lganligi uchun ikki tomon ham juda ko'p ter to'kdi. Bugungi raqibimiz gollar urish bobida bizdan kuchsiz emas, tarkibida ham Oliy Ligada to'p surgan yigitlar borligi bois hurmatga sazovor raqib edi. Oson kechmagan bahsda g'alaba qozonganimizdan xursandman.

- Yaqinda safga qaytgan Azamat Bobojonov bugungi uchrashuvda hatto zaxira o'rindig'idan ham o'rin olmadi. Bunga sabab nima?

- Azamat yaqinda Universiada musobaqasidan qaytib kelgandi. Ammo oilaviy sharoitlariga ko'ra, Nukusga qaytib ketdi. Keyingi o'yinlarimizdan u safga qaytadi.

- Dinamo ketma-ket 10-g'alabaga erishib, peshqadamlikni mustahkamladi. Barchasi o'zingiz istagandek reja asosida ketmoqdami?

- Raqobatchilarimiz bilan oradagi farqimiz katta emas, shu bois peshqadam ekanligimiz hali hech narsani anglatmaydi. To'g'ri, ko'zlaganimizdek ayni damda birinchi o'rindamiz va maqsadimiz – Oliy Ligaga chiqish uchun kurashayapmiz. Ammo, o'yinimiz borasida yanada ishlashimiz, ko'proq gol urib, kamroq gol o'tkazishimiz va uyimizda barcha raqiblarni mag'lub etib, safardan ham imkonqadar g'alabalar bilan qaytishimiz kerak. Turdan-turga raqobatchilarimiz bilan oradagi farqni yanada kattaroq qilishimiz kerak. O'shanda barchasi rejadagidek ketmoqda, deyish mumkin bo'ladi. Hozir peshqadam bo'lsakda, qiyin uchrashuvlarimiz hali oldinda.

Dinamo Matbuot xizmati.