Ilhom Mo'minjonov: “Lushanning ketishini kutmagandim”

Xabaringiz bor, safarda kechgan “So'g'diyona”ga qarshi bahsdan so'ng “Bunyodkor” futbol klubi rahbariyati yangi bosh murabbiy etib Sergey Lushanni tayinladi. Bungacha Sergey Ivanovich O'zbekiston yoshlar terma jamoasida ishlab kelayotgandi. Lushan “Bunyodkor”ga to'liq o'tib ketganidan so'ng yoshlarni vaqtincha Ilhom Mo'minjonov boshqarib turadigan bo'ldi.

Ayni paytda Mo'minjonov boshqarayotgan jamoa Armanistonda bo'lib turibdi va 12, 14 iyunda Armaniston yoshlar termasiga qarshi ikkita o'rtoqlik o'yini o'tkazadi.

“Sergey Lushan yoshlar terma jamoasini kutilmaganda tark etdi, - deydi futbolchilik faoliyatini yakunlab endilikda murabbiylik qilayotgan Mo'minjonov. - To'g'risini aytsam, buni eshitib o'zim ham hayron qoldim. Biz Sergey Ivanovich bilan yaxshi ishlab kelayotgandik. Bundan buyon yoshlar terma jamoasini Dmitriy Kim ikkalamiz boshqarib turamiz. Keyinchalik nima bo'lishini esa bilmayman. Menimcha, hammasi Armanistonga borib kelganimizdan so'ng hal bo'lsa kerak”.