Ildar Sakaev – Oq-tepaning tarixida qolgan murabbiy!

O'shanda milliy terma jamoamiz dastlab 2ta gol evaziga, keyin penaltilar seriyasi tufayli mundialdan “quruq” qolgan bo'lsa, “Oq-tepa” avvaliga o'z uyidagi ikki uchrashuvdagi durang, so'ng o'tish o'yinida foydalanilmagan vaziyatlar “qurboniga” aylandi. Bunda albatta klub rahbariyatining siyosatini etirof etish joiz. Jamoa bugungi kunda birinchi liganing birinchi raqamli klubiga aylanib ulgurdi. Bunga hech qanday gap-so'z bo'lishi mumkin emas. Klubning o'tgan yilgi natijasida bevosita bosh murabbiy Ildar Sakaevning ham hissasi beqiyos. Tajribali mutaxassis garchi shogirdlari bilan oliy liga yo'llanmasini qo'lga kirita olmagan bo'lsa-da, “Oq-tepa”ni ilk bor chempionatni ikkinchi o'rinda yakunlanishiga hissa qo'shdi va klub tarixida qoldi.

Murabbiylar haqida

2000 yildan o'z faoliyatini boshlagan “Oq-tepa” 2005 yilga qadar Toshkent shahar 2-liga bahslarida ishtirok etgan. Xuddi o'sha yili shahar birinchiligida g'olib chiqqan klub, 1-ligaga o'tish turnirida ishtirok etib, yo'llanmani qo'lga kiritadi. Jamoani 1-ligadagi debyut mavsumida marhum Nizom Nortojiev va Otabek Mansurov murabbiylar juftligi boshqaradi. Debyut mavsumda jamoa 38ta uchrashuvda maydonga tushib, 14ta o'yinda g'alaba qozongan bo'lsa, 6 uchrashuvda durang qayd etgan. Qolgan bahslarda mag'lubiyatga uchrab, musobaqani 48 ochko bilan 11-pog'onada yakunlagan. 2007 yil Otabek Mansurov boshqaruvidagi jamoa ancha o'ziga kelib olib, birinchi ligaga moslashganini barchaga ko'rsatib qo'yadi. To'g'ri, “Oq-tepa” chempionatni yana 11-o'rinda tugatadi, biroq g'alabalar soni ko'proq, mag'lubiyatlar sezilarli darajada kamayadi. Klub birinchi ligadagi uchinchi mavsumida Ravil Imomov murabbiyligida kattagina sakrash qilib, chempionatni oltinchi o'rinda yakunlaydi. 

Ayrim sabablarga ko'ra, “Oq-tepa” 2009 yil 1-ligada ishtirok etmaydi. 2010-2011 yilgi mavsumlarda yosh mutaxassis Aleksandr Mochinov “Oq-tepa” ustozi sifatida faoliyat olib boradi. Yosh murabbiyga tajriba kamlik qilib, jamoaning natijalarida pasayish kuzatiladi. Toshkentliklar 2010 yilgi mavsumni 11-o'rinda yakunlagan bo'lsa, oradan bir yil o'tib, chempionatning haqiqiy autsayderiga aylanadi. Ahamiyatlisi shundaki, Aleksandr Mochinov klub tarixida ikki yil murabbiy sifatida ishlagan yagona mutaxassis bo'lib turibdi, hozircha...

2012 yil murabbiylik yosh mutaxassis Vohid Xolboevning qo'liga o'tdi. Ammo yosh murabbiy mavsum yakunlanmasidanoq istefoga chiqarildi. CHempionat marhum Farhod Abdurasulov rahbarligida 8-o'rinda yakunlandi. O'sha mavsum “Oq-tepa” libosida futbolchi sifatida to'p surgan Aleksandr Tokov 2013 yil jamoaga murabbiylik qiladi. Bu yosh mutaxassisga ham tajriba etishmaydi. Natijada klub chempionatni 10-pog'onada yakunlashga majbur bo'ladi. 2014 yil klubga yana Aleksandr Mochinov qaytadi. Jamoa oldiga rasman oliy ligaga chiqish vazifasi qo'yiladi. Birinchi bosqichda hammasi bir maromda ketayotgan vaqtda Aleksandr Vladimirovich o'z xohishi bilan istefoga chiqadi. Ikkinchi bosqichdan tajribali mutaxassis Furqat Esanboev bosh murabbiy etib tayinlanadi. Murabbiylar shtabidagi o'zgarishlar, orada jamoa ustozsiz qolishi yakunda natijalarga ham o'z tasirini o'tkazib, “Oq-tepa” oliy ligaga chiqa olmaydi. So'nggi turdagi mag'lubiyat sabab uchinchi o'rindan ham “quruq” qoladi, ammo 4-o'rin klub uchun tarixiy natija hisoblanardi. Sababi, jamoa birinchi ligadagi faoliyati davomida hali mavsumni to'rtinchi o'rinda yakunlamagandi. Biroq vazifa bajarilmagani bois, ilk bor qo'lga kiritilgan to'rtinchi o'rinning zavqi bo'lmadi.

Tarixda qolgan 2015 yil

Jamoa 2015 yil ham o'z oldiga oliy ligaga chiqish vazifasini qo'ydi. So'nggi mavsumda Furqat Esanboevga yordam bergan Ildar Sakaev bosh murabbiy etib tayinlandi. Ildar Usmonovich ko'p jihatlar bo'yicha klub tarixida qoldi. Xususan, garchi jamoa oliy ligaga chiqa olmagan bo'lsa-da, bunga juda yaqin keldi. Oliy liga jamoasi bo'lmish “So'g'diyona” qarshi o'tkazilgan o'tish o'yini murabbiyning ishini ko'rsatib berdi. Garchi poytaxtliklar shu kuni mag'lubiyatga uchragan bo'lsa-da, maydonda qanday jamoa ekanliklarini ko'rsatib qo'ydi. Klub birinchi ligada ishtirok etishni boshlaganidan beri ilk bor o'z maydonida faqatgina bir marta mag'lubiyatga uchradi. Yodingizda bo'lsa, “Oq-tepa” birinchi bosqichda o'z maydonidagi 9 uchrashuvning barchasini g'alaba bilan tugatgandi, hatto durang ham qayd etilmagandi. Ammo ikkinchi bosqichning 1-turida “Xorazm”dan kutilmagan mag'lubiyat qabul qilib olindi. Mavsum yakunlanishi arafasida esa, “Orol” va “Mashal” Toshkentdan nafaqat bir ochko bilan qaytdi, balki oliy liga yo'llanmasini “Oq-tepa”dan “olib”, “Obod”ga “berib” ketdi. To'g'ri, jamoa o'z oldiga qo'yilgan vazifani bajara olmasa, bunda safar o'yinlaridagi ochko yo'qotishlar ham inobatga olinadi, ammo “Oq-tepa”da o'z maydonida boy berilgan 7 ochko amalda klubni oliy ligadan mahrum qildi. Lekin o'z uyidagi bir mag'lubiyat, ikki durang tarixga kirdi. Boisi, jamoa shu kunga qadar butun mavsum davomida o'z uyida kamida 3 marta mag'lubiyatga uchragandi. Aksar hollarda mag'lubiyatlarning soni ko'payib ketardi. Ildar Sakaev murabbiyligidagi jamoa raqiblariga haqiqiy “chaqilmas yong'oq” bo'la oldi deyish mumkin. Aytgancha, shu erda O'zbekiston Kubogi doirasida “Neftchi”ga qarshi o'tkazilgan uchrashuvni eslab o'tmasak bo'lmaydi. O'sha vaqtda oliy liga peshqadami bo'lib turgan farg'onaliklar poytaxtda yirik hisobda yutqazib qo'yishganini ko'pchilik kutilmagan natija sifatida etirof etdi. Zero, “Neftchi” oradan uch kun o'tib, “Bunyodkor”ni o'z uyida yutishning uddasidan chiqqandi. Mayli, natija kutilmagan bo'lishi mumkin, ammo bu erda futbolchilardan tashqari, murabbiyning ham mehnatini etirof etish darkor. CHunki “Oq-tepa”dan oldin “Neftchi”da ishlagan Ildar Sakaev ushbu qarama-qarshilik orqali o'zining qanday mutaxassis ekanligini amalda ko'rsata oldi. Asosiysi, garchi kubok o'yinlari birinchi liga jamoasi uchun muhim rol o'ynamasada, shogirdlarini uchrashuvga ajoyib tarzda tayyorlay bildi. Natijasini hamma biladi. 

Yana bir fakt: “Oq-tepa” deyarli har mavsum oliy ligaga chiqishga asosiy davogar jamoalarni o'z uyidagi o'yinlarda mag'lubiyatga uchratar edi. Buning uchun 2013 yil “Andijon”ning 9 o'yin, “Mashal”ning naqd 23 uchrashuv davom etgan mag'lubiyatsiz seriyasi Toshkentda to'xtaganini eslash kifoya. O'tgan yili “Qo'qon-1912” va “SHo'rtan” ham poytaxtdan mag'lubiyat bilan qaytishga majbur bo'lgan. 2007 yil “So'g'diyona”, 2008 yil “Xorazm”, 2010 yil “Buxoro”, “So'g'diyona” va 2012 yil “So'g'diyona” hamda “Guliston” Toshkentda mag'lubiyatini tan olgan. Ayrim o'yinlarda yirik hisoblar ham qayd etilgan. “Oq-tepa” faqatgina 2011 yil oliy liga yo'llanmasini qo'lga kiritgan “Lokomotiv” va “Guliston” oldida ojiz qolgan. Ildar Sakaev boshchiligidagi futbolchilar bu yil aynan shu jihat bo'yicha ham tarixga kirishdi. Yani, jamoa o'zi birinchi ligada qatnasha boshlagan yillarda peshqadamlarni Toshkentda kerak bo'lsa, yirik hisoblarda mag'lubiyatga uchratgan bo'lsa-da, safardagi o'yinlarda xuddi o'sha hisoblarda yutqazib ham qo'ygan. Faqat bu yil peshqadam “Obod” ikkala uchrashuvda ham “taslim” etildi. Albatta bunda futbolchilardan tashqari, bosh murabbiy Ildar Sakaevning ham hissasi beqiyos. SHu erda murabbiy asosiy o'yinlarga shogirdlarini qanday tayyorlashni bilishiga qoyil qolmay iloj yo'q. Ildar Usmonovichning klub tarixida qolishiga asosiy sabab shuki, “Oq-tepa” mavsumni ikkinchi o'rinda yakunladi va PFL tomonidan maxsus diplomlar bilan taqdirlandi. Bu ham o'ziga xos tarix! 

“Oq-tepa”ning birinchi ligadagi ko'rsatkichlari