Hikmat Hoshimov 400lik dovondan o'tdi

Bu voqeilik “Metallurg”ning bu yilgi mavsumdagi birinchi safar o'yini – “Mashal” jamoasiga qarshi kechgan o'yinida sodir bo'ldi. Xabaringiz bor, bekobodliklar bu uchrashuvda 3:1 hisobida irodali g'alabani qo'lga kiritishgan hamda jamoa sardori har doimgidek muvaffaqiyatda o'zining munosib hissasini qo'shgandi. Biz Hikmat Hoshimovni oliy ligada 400-lik dovonni zabt etganligi bilan samimiy tabriklaymiz!

Hikmat Hoshimov futbolchilik faoliyatini ikkinchi liga jamoalarida boshlagan. 1992 yildan 2000 yilgacha faoliyat olib borgan MHSK futbol klubi 1998 yilda yosh o'yinchilarni tarkibga jalb etish borasida tanlov elon qildi. Tanlov hayatiga uzun bo'yli, oriqqina Hikmat Hoshimovning o'yini maqul keldi. O'sha mavsumning o'zida Hoshimov 4 ta uchrashuvda maydonga tushdi. Ammo oliy ligada asosiy tarkibdan muqim joy egallay olmagan Hoshimov ikki mavsum davomida birinchi ligada faoliyat yuritdi.

2001-2002 yillarda esa u Jizzaxning “So'g'diyona” jamoasida 43 ta o'yinda maydonga tushdi. 2003-2004 yillarda “Metallurg”da o'ynagan H.Hoshimov poytaxt jamoalari nazariga tushdi va “Lokomotiv”ga qabul qilindi. Bir yil mobaynida temiryo'lchilar bilan birga bo'lgan Hikmat keyingi ikki mavsumni “Andijon” hamda “Nasaf” jamoalarida o'tkazdi. 2008 yildan boshlab 3 yil mobaynida yana qadrdon jamoasiga qaytgan Hoshimov 2010 yilgi mavsumning dastlabki davrasini “Bunyodkor” tarkibida o'tkazdi. Ammo qaldirg'ochlar safida uzoq qolmadi va 2011 yilning ikkinchi yarmidan yana madanchilar tarkibida o'ynab kelyapti. Jamoa sardori, klub “yuragi” safatida oxirgi ikki mavsumni o'zgarishlarsiz, to'liq o'tkazgan Hikmat Hoshimov tabiiyki klub rekordchisi ham sanaladi. O'z navbatida u bugungi kunga kelib faoliyat yuritayotgan o'yinchilar orasida eng ko'p maydonga tushgan o'yinchilardan biri sanaladi. 402 ta o'yini davomida Hikmat Hoshimov raqiblari darvozasiga 40 ta gol kiritishga muvaffaq bo'lgan.  

SHu o'rinda oliy liga musobaqalarida eng ko'p o'yin o'tkazgan futbolchilar ro'yxatini Asror Aliqulov boshqarib borishini aytib o'tmoqchimiz. U turli jamoalar tarkibida 500 dan ziyod maydonga tushgan. 400 dan ko'p uchrashuvda maydonga tushgan gvardiyachilar ro'yxatida keyingi pog'onalarni Anvar Berdiev, Ro'ziqul Berdiev, Vali Keldiev, No'mon Hasanov, Muxtor Qurbonov, Anvar Soliev, Botir Qoraev, Xayrulla Karimov va Abdumajid Toirovlar egallashgan. Hikmat Hoshimov futbol tili bilan aytganda tarkibni to'ldiruvchi 11-o'yinchiga aylandi.

"Metallurg" matbuot xizmati