Hamidjon Aktamov: "Qizilqum"ning oldiga aniq vazifa qo'yilmagan"

- Yutishimiz kerak bo'lgan o'yinda durang o'ynadik. Ikkinchi taymda jamoamiz yaxshi o'ynadi. Futbolchilarga etirozim yo'q. Yaratilgan vaziyatlardan foydalana olmadik. To'rtinchi marotaba ketma-ket durang qayd etdik. Hujumlarni golga aylantirishda oqsayapmiz, - deya o'yin haqidagi fikrlari bilan o'rtoqlashdi Hamidjon Aktamov.

- Hujumchi Vohid SHodievni umuman tanib bo'lmay qolgan. SHodiev legioner bo'lib o'ynab kelganidan buyon butkul o'zgargan. Uning o'rnini egallashi mumkin bo'lgan hujumchilar yo'qmi yoshlar jamoasida? To'g'risini aytganda, "Qizilqum" SHodiev bilan bir futbolchi kam o'ynayotgandek taassurot qoldirmoqda...

- Bekzod G'anijonov bor yosh hujumchilardan. Lekin bu futbolchini jarohati borligi uchun undan foydalana olmayapmiz. Hozircha hujumchilar borasida oqsayotganimiz bor gap. Zaxirada ham ularni o'rnini to'ldiradigan futbolchilar yo'q.

- Bugun zaxiradan faqatgina birgina futbolchini maydonga tushirdingiz...

- Ikkinchi bo'limda Otabek Zokirovni maydonga tushirgach o'yinimizda, xususan qanotlarimiz yanada faollashdi va birinchi taymga nisbatan kuchliroq o'ynadik. Lekin hujumlarga yakuniy nuqtani qo'yishda adashdik. "Obod" ham yaxshi jamoa. Bugun ular juda tartibli himoyalanishdi. Qoyil. Nega zaxira imkoniyatidan to'liq foydalanmaganimga keladigan bo'lsak, maydondagi futbolchilarning o'yini, holati meni qanoatlantirayotgandi. SHu boisdan ham boshqa o'zgarishlarni amalga oshirmadim.

- Alisher Yusupov ko'rinmay qoldi...?

- Alisher Yusupov jiddiy jarohat olgan. Uning qachon safga qaytishi hali nomalum.

- Jamoa oldiga aniq vazifa qo'yilganmi?

- Biz yuqori o'rinlar uchun harakat qilamiz, intilamiz. Lekin jamoamiz oldiga aniq vazifa qo'yilmagan. Maqsadimiz iloji boricha yuqori o'rinlardan birini egallash.

Eslatib o'tamiz, "Qizilqum" jamoasi Oliy liganing oxirgi to'rtta uchrashuvidan buyon durang o'ynamoqda. Dastlab Navoiyda "So'g'diyona", "Olmaliq", "Nasaf" va "Obod"ga qarshi o'yinlarda durang qayd etildi.

"Qizilqum" jamoasi 9-turdan keyin 10 ochko jamg'argan holda turnir jadvalining 12-pog'onasida bormoqda.