Hakim Fuzaylov: "Superligada hech kimga oson emas"

CHempionat start oldi. Bilasiz, "Buxoro" avvalgi ikki mavsumda Superligada qatnashmadi. Birinchi o'yin safarda "Turon"ga qarshi qiyin kechishi aniq edi. Umuman hech kimga oson emas. O'yinga to'xtalsam, yaxshi boshladik, gol urdik. Ikkinchi bo'limda xotirjamlikka berildik. CHetlatishga qaramay yigitlar borlarini berishdi. Xatolar bor albatta. Muhim uch ochkoni ishlab oldik. Futbolchilarga rahmat aytib qolaman",- deydi Hakim Fuzaylov. 

-  "Turon"  "Buxoro" uchun tanish raqib. O'tgan yili Pro ligada to'rt marotaba to'qnash keldinglar. Aynan shu omil g'alabaga tasir qildimi?

- Unchalik demagan bo'lardim. Ikki jamoada bir qator yangilanishlar bo'ldi. Yangi futbolchilar bor. Ochig'i "Turon" ko'proq futbolchi qo'shib oldi. Biz o'z o'yinimizni ko'rsatdik. Hozir bahor va mavsum boshlanishi. Superligada kuchli jamoalar ko'p.  SHu bois har bir o'yin bugungidek qiyin o'tadi. 

- Aleksandar Stanisavlevichning zaxiradan maydonga tushishi kutilmagan bo'ldi...

- U sonidan jarohat oldi. Uzoq vaqt davolandi. Hali funkcional tayyor emas. Biroz vaqt zarur. Aleksandarni bizdan tashqari ham o'zida ko'radigan jamoalar bor edi. Bunday futbolchi jamoamizga kelganidan xursandmiz. Funkcional tayyor bo'lganidan so'ng sekin-asta tarkibga qo'shib boramiz.

- Fayzullobek Jumanqo'zievning qizil kartochkasiga munosabatingiz?

- Bu - futbol. O'sha vaziyatda hakamlar adolatli qaror qabul qildi. Qoida buzilgandi.

- "Buxoro" oldiga qanday maqsad qo'yilgan?

- Birinchi o'rinda tomoshabinlarni o'z o'yinimiz bilan stadionga qaytarish. Yaxshi o'yin ortidan natija ham keladi.