Futzal. Oliy liga. Murabbiylar qanday fikrda?

Abdulla Bo'riev ("Bunyodkor" futzal jamoasi bosh murabbiyi):

- Qiyin o'yin bo'ldi. "Nasaf" bizning jamoa uchun doim noqulay raqib bo'lib kelgan. Ular kecha qo'lga kiritilgan 1 ochkodan ruhlanib, bugun yanada kuchliroq harakat qilishdi. Ammo, ketma-ket uchralgan ikki mag'lubiyatdan so'ng bizga ham g'alaba suv va havodek zarur edi. Kelgusi bahslarda yo'l qo'yilgan xatolardan xulosa chiqarib, yanada yaxshi o'yin ko'rsatishga harakat qilamiz.

Alisher Yusupov ("Nasaf" futzal jamoasi bosh murabbiyi):

- Yomon o'yin bo'lmadi. Biroz omad ham kelmadi. Futzalchilarimizda tajriba kamroq ekanligi bois, oddiy vaziyatlarda ham gol o'tkazib yubordik.

Farhod Mirahmedov ("Lokomotiv" futzal jamoasi murabbiyi):

- Kecha kuchli raqib ustidan yirik hisobda g'alabaga erishdik. Balki, shu boisdan yigitlar bugun biroz xotirjamlikka berilishdi. Doim raqibni hurmat qilib, har bir uchrashuvga jiddiy tayyorgarlik ko'rish kerak.

Farruh Zokirov ("Neftchi" futzal jamoasi bosh murabbiyi):

- "Lokomotiv" yaxshi shakllangan jamoa. Kecha HUAXIN-Jizzax ustidan g'alaba qozondi. Yigitlarga koncentraciyani yo'qotmaslik kerakligini uqtirgan edim. O'z imkoniyatlarimizdan maksimal foydalandik, deb o'ylayman. Jamoamning o'yini asta-sekinlik bilan rivojlanib bormoqda.

Bahodir Ahmedov (HUAXIN Jizzax bosh murabbiyi):

- Bugungi o'yin juda ham qiyin bo'ldi. Ikki yaxshi jamoa o'zaro bahs olib bordi. Vaziyatlardan unumli foydalanib, g'alaba qozondik. Olmaliq jamoasiga rahmat aytman. Juda yaxshi o'yin ko'rsatishdi.