Ertaga "Paxtakor" safarda ilk g'alabasini nishonlaydimi?

Bugun "Paxtakor" yangi bosh murabbiy SHota Arveladzeni keng jamoatchilikka tanishtiruv marosimini o'tkazadi. Lekin bu yangi murabbiy bugunning o'zidayoq jamoani qabul qilib oladi degani emas. Bizga malum bo'lishicha, futbolchilarni ertangi o'yinga ham Jasur Abduraimov tayyorlaydi va gruziyalik murabbiy ikkinchi davradan jamoani o'z qo'liga oladi.

Ertaga "Paxtakor" bu yil hisobidan birinchi marta safarda g'alaba qozonishi mumkin. Hozircha jamoa safarda 6ta o'yinda maydonga tushgan bo'lsa, shundan uchtasida durang o'ynagan va uch bor mag'lub bo'lgan. To'plar nisbati 2-10. Albatta, "Paxtakor"dek klub uchun safarda atigi ikkita gol urish juda g'alati.

Ertangi raqib "Obod" hozirgi sharoitda kuchli emas. To'g'ri, "Obod" o'z maydonida "Dinamo" bilan chiroyli o'yin ko'rsatdi, lekin shundan so'ng ketma-ket uchta uchrashuvda mag'lub bo'ldi. Bu ahvolda ertaga bu jamoa "Paxtakor" bilan qanday o'ynaydi, hayronmiz.

"Paxtakor" Jasur Abduraimov qo'l ostida chiroyli o'yin ko'rsatayotgani yo'q, lekin natija bor. Hozircha "sherlar" ushbu murabbiy bilan ettita o'yinda ishtirok etib, shundan to'rttasida g'olib chiqishdi. Yani, "Paxtakor" Jasur Abduraimov boshchiligida uydagi hamma o'yinlarni yutdi, biroq safarda ikki bor durang o'ynagan bo'lsa, bir marta mag'lubiyatga uchradi.

Agar "Paxtakor" ertaga "Jar" stadionida g'alaba qozonadigan bo'lsa, bu "Paxtakor"ning safardagi ilk uch ochkosi bo'ladi. Mabodo "Obod" zafar quchsa, bu Inileev shogirdlarining uydagi ikkinchi g'alabasi bo'ladi.