Erondan fotomaqola: “Lokomotiv”ning g'alabasiga bag'ishlanadi

Kecha Eronning Isfahon shahrida bundan besh badtar bo'ldi. Safarda “Sepaxon” mehmoni bo'lgan “Lokomotiv” mana shunday qiyin ob-havo sharoitida 2:0 hisobida g'alaba qozonib, bu yilgi OCHL guruh bosqichida dastlabki uch ochkoni qo'lga kiritdi.

SHu o'rinda fotosuratlar orqali “Lokomotiv”ning Eronda o'tkazgan kunlariga va qanday qilib g'alabaga erishganiga to'xtalishni lozim topdik. Zero, bu ham muxlislarga xush yoqadi degan umiddamiz.

“Lokomotiv” futbol klubi delegaciyasini o'z bag'riga olgan samolyot 13 mart kuni kunduzi soat 10:00da Toshkentdan Ishafon tomon parvoz qildi. Qariyb uch soatlik parvozdan so'ng manzilga etib bordik va bizni aeroportda “Sepaxon” futbol klubi vakillari kutib olishdi. U er bizning vaqt bilan bir yarim soat orqada ekan.

“Temiryo'lchilar” shahar markaziga yaqinroq joydagi Kowsar Hotel mehmonxonasiga joylashishdi. Mehmonxonadagi sharoitlar yaxshi bo'ldi. Murabbiylar birinchi kunning o'zidayoq mashg'ulot rejasini ishlab chiqishdi va kechki payt avtobusda butun jamoa bo'lib “Sepaxon”ning qo'shimcha maydoniga yo'l oldik.

Birinchi kungi mashg'ulotda oyog'ida og'riq his qilgani bois jamoamiz sardori Timur Kapadze ishtirok eta olmadi. SHunda hamma xavotirga tusha boshladi. “Al Ittihod” bilan o'yinni aynan jarohat deb Server Jeparov o'tkazib yuborgandi. Nahotki, bu safar Kapadze yordam bera olmasa degan xayolga bordik. Ertasi kuni o'yin bo'ladigan stadionda mashg'ulot boshlanganida xayriyat Kapadze safda edi, u boshidan oxirigacha mashg'ulotda ishtirok etdi.

Timur Kapadzening umumjamoaga qaytgani qanchalik xursand qilgan bo'lsa, Nemanya Yanichichning elkasidan og'riq his qilib o'yinni o'tkazib yuborishi shunchalik xafa qildi. O'yindan bir kun oldingi mashg'ulotda Yanichich alohida o'zi shug'ullandi. Elkasidagi og'riq to'xtamadi. Kechga borib esa uning maydonga tusha olmasligi oydinlashdi.

Natijada “Sepaxon”ga qarshi bahsda himoya markazidan SHerzod Fayziev bilan Islom To'xtaxo'jaev o'rin egalladi. Qanotlarni mos ravishda Oleg Zoteev bilan Salim Mustafoev yopishdi. Bir kun oldingi makshg'ulotda ob-havo ancha yaxshi edi. Hatto o'yinoldi matbuot anjumanida Andrey Miklyaev ayni futbol o'ynaydigan havo deya aytib o'tgandi.

Lekin o'yin kuni shunday bo'lishini kim bilibdi deysiz. Ertalabdan sharros yomg'ir quya boshladi. Stadionga kirib borganimizda yomg'ir yanada zo'raydi. Oddiy yomg'ir emas, balki kuchli shamol aralash yomg'ir. Endi bundan badtari bo'lmasa kerak. Rasm olay desam, hamma yoq
shalabbo bo'lgan. Maydonda besh daqiqa tursangiz bo'ldi, butunlay ivib keasiz. Buning ustiga shamol tufayli yomg'ir nuqul odamning yuziga uradi.

Mahalliy vaqt bilan soat 16:00da uchrashuvga start berildi. Futbolchilar hali jamoaviy rasmga tushishga ulgurmasdanoq ho'l bo'lib ketishdi. Qolaversa, nafas olish qiyinlashib qoldi. Yomg'ir yoqqani uchun bo'lsa kerak, stadionga juda kam muxlis keldi: bir yarim mingdan sal ko'proq. Birinchi bo'limning o'zida Maxaradze o'zini yomon his qila boshladi va murabbiylardan almashtirishni so'radi. Natijada ikkinchi bo'limda uning o'rniga Jeparov harakat qildi.

O'yinning 15-daqiqasida hisob ochildi. Bu vaziyatda Sanjar SHoahmedov ikki futbolchi orasidan to'pni juda ajoyib tarzda Marat Bikmaevga to'pni etkazib berdi. Bikmaev esa o'zining “sehrli” chap oyog'ida burama zarba yo'llab gol urdi. 87-daqiqada Sardor Mirzaev jamoasining ikkinchi to'pini kiritib, hisobni 2:0ga etkazdi. Raqib haqida nima deyish mumkin? “Sepaxon” ko'p ham kuchli ko'rinmadi. Ular bilan bemalol o'ynasa bo'ladi. O'yinidagi mazmun asosan braziliyalik hujumchi SHimbaga to'p uzatishga qaratilgan.

Kechagi bahsda hamyurtimiz Fozil Musaev ham qo'lidan kelgancha harakat qildi. Bir vaziyatda uning zarbasidan so'ng gol bo'lishi ham mumkin edi, lekin Ignatiy Nesterov to'pni vaqtida qaytarib golning oldini olib qoldi. Bir so'z bilan aytganda, kecha “Lokomotiv” juda qiyin g'alabani qo'lga kiritdi. CHunki “temiryo'lchilar” raqibdan ham ko'ra, ob-havo bilan ko'proq kurash olib borishdi. SHunga qaramay, safarda ijobiy natija qo'lga kiritilganidan xursandmiz.

Umuman olganda, biz kecha maydonga tushgan yoki tushmagan – barcha futbolchi va murabbiylarni g'alaba bilan tabriklab qolamiz. “Lokomotiv”ning g'alabalari davomiy bo'lishini so'rab qolamiz. “Loko” safida OCHLda o'zining uchinchi golini urgan Sardor Mirzaevga alohida rahmat! U kecha gol urishdan tashqari o'tgan yil “Al Hilol”ga, bu yil esa “Al Ittihod”ga to'p kiritgandi. “Sepaxon”ga qarshi bellashuvning “Eng yaxshi futbolchisi” deb topilgan Marat Bikmaevni ham tabriklab qolamiz.

“Lokomotiv” OCHLning dastlabki uch o'yinida besh ochkoni qo'lga kiritdi, oldinda bizni yana uchta bahs kutib turibdi. Nasib qilsa, bu o'yinlarni ham ijobiy yakunlab guruhdan albatta chiqamiz.

Xayrulla Xoliqov. (Suratlar muallifniki)