Eronda vaziyat keskin: AQSH o'z fuqarolarini mamlakatdan chiqib ketishga chaqirdi. O'zbekistonlik futbolchilar taqdiri qanday kechadi?

Tehrondagi AQSH virtual elchixonasi tomonidan elon qilingan xavfsizlik ogohlantirishida amerikalik fuqarolarga Vashington mamuriyati yordamiga murojaat qilmasdan Erondan chiqib ketishni rejalashtirish qatiy tavsiya etildi.

"Darhol Eronni tark eting. Agar chiqib keta olmasangiz, uyingizda qoling yoki boshqa qo'riqlanadigan binodagi xavfsiz joyga o'ting", – deyiladi bayonotda.

Avvalroq Oq uy matbuot kotibi Kerolayn Levitt AQSH prezidenti Donald Tramp Eron masalasida, avvalo, diplomatik yo'lni afzal ko'rishini, biroq harbiy kuch qo'llash imkoniyati ham doimo kun tartibida qolishini takidlagandi.

Eronda norozilik namoyishlari 2025 yil 28 dekabr kuni Tehrondagi Katta bozorda boshlangan. Do'kon egalari milliy valyutaning keskin qadrsizlanishi va iqtisodiy qiyinchiliklarning kuchayib borayotganidan norozi bo'lgan. Keyinchalik namoyishlar mamlakatning ko'plab shaharlariga tarqalgan.

Namoyishlar chog'ida halok bo'lganlar va yaralanganlar haqida rasmiy malumotlar elon qilinmagan. Biroq Eronning inson huquqlari agentligi HRANA xabariga ko'ra, 642 kishi halok bo'lgan. Ular orasida 133 nafar xavfsizlik kuchlari xodimi, 1 nafar prokuror va voyaga etmaganlar ham bor. Shuningdek, 10 721 kishi hibsga olingan.

Zo'ravonlik kuchayishi va policiya aralashuvi oshishi fonida 9 yanvar kuni butun mamlakat bo'ylab internet o'chirib qo'yilgan.

Malumot o'rnida, Eronda O'zbekiston terma jamoasining 5 nafar azosi to'p tepadi. Bular — Rustam Ashurmatov, Jaloliddin Masharipov (ikkisi – "Istiqlol"), Oston O'runov, Igor Sergeev ("Persepolis") va Odil Hamrobekov ("Traktor").