"Dinamo" oliy ligaga qaytdi!

Bevosita uchrashuv haqida gapiradigan bo'lsak, bahsni hujumkor boshlagan vakillarimiz o'yinning dastlabki daqiqalaridanoq golli vaziyatlar yaratishdi. 15-daqiqaga kelib esa jamoa va chempionat to'purarlaridan biri Amirjon Safarov hisobni ochishga erishdi, 1:0.

Goldan ruhlangan mezbonlar hujumkorlikni to'xtatishmadi va oradan 8 daqiqa o'tib, qanotdan yoshlar terma jamoasi azosi Saidjamol Davlatjonov tomonidan etkazib berilgan to'pni Viktor Klishin bosh bilan raqib darvozasiga kiritdi, 2:0.

O'yinning 32-daqiqasida esa raqibning kam sonli hujumlaridan biri himoyachi Akmal Bozorovning kutilmaganda o'z darvozasini ishg'ol etib qo'yishiga sabab bo'ldi, 2:1.

Ikkinchi bo'limda Dinamo bosh murabbiyi Ilhom SHaripov bir qator o'zgarishlarga qo'l urdi va bu o'zini oqladi. 68-daqiqada Alisher Xoliqov burchakdan Omadjon Tayloqov tomonidan etkazib berilgan to'pni bosh bilan Yozyovon-Lochinlari darvozasiga kiritib hisobni 3:1ga etkazdi.

83-daqiqada esa aynan Alisher Xoliqovning to'p oshirishidan so'ng Mirkomil Lokaev tezkorligi evaziga tablodagi hisobni 4:1 ga etkazib, samarqandlik muxlislarning bayramni boshlashlariga amalda ruxsat berdi.

Zero, aynan ushbu g'alabadan keyin Dinamo jamoasining turnir jadvalidagi ochkolari soni 78 taga etdi va Samarqand klubi eng yaqin taqibchisi bo'lmish Norin jamoasini 6 ochkoga ortda qoldirmoqda. Dinamoning so'nggi turda Cementchi, qoldirilgan o'yinlarda esa Kosonsoy va Xotira-79 jamoalariga qarshi qanday hisob qayd etishidan qatiy nazar jamoamiz rasman Oliy Liga yo'llanmasiga ega chiqdi. CHunki yaqin taqibchi Norin hisobida ikkita o'yin bor va raqib bu bahslarda g'alaba qozongan taqdirda ham o'zaro o'yinlar bo'yicha ustunlik aynan Dinamoda sanaladi.

SHunday ekan, oldinda uchta o'yin bo'lishiga qaramay, Dinamo jamoasi va uning barcha muxlislarini Samarqand klubining bir yillik tanaffusdan so'ng yana Oliy Ligaga qaytgani bilan tabriklaymiz!

5 noyabr kuni Dinamo Samarqandda Cementchi klubini qabul qiladi va aynan ushbu bahsdan keyin Samarqandda chempionatning yopilish marosimi o'tkaziladi.

Birinchi Liga. 35-tur

2 noyabr (chorshanba)

DINAMO - YOZYOVON-LOCHINLARI - 4:1

Samarqand, 2000 tomoshabin.

Bosh hakam: Ishoq Ibragimov (Nukus)

Gollar: Amirjon Safarov 15, Viktor Klishin 23, Alisher Xoliqov 68, Mirkomil Lokaev 83 – Akmal Bozorov (avt, 32).

Dinamo: Mixail Naumov, Akmal Bozorov, Aleksey Nikolaev, Mirkomil Lokaev, Firdavs Abdusalimov (Ubaydullo Nabiev, 58), Iskandar Xolmirzaev (Jasur Azimov, 46), Omadjon Tayloqov (Komil SHarofutdinov, 78), Saidjamol Davlatjonov (Jonibek Ko'chimov, 56), Doston Ibragimov, Viktor Klishin (Alisher Xoliqov, 64), Amirjon Safarov.

Yozyovon-Lochinlari: A.Faxriddinov, YO.Yoraliev, U.Hoshimov, Z.Ismoilov, B.Abdumannonov, SH. Abdurahmonov, B.Madrahimov, D. Xolmatov, B. Rasulov, J.Saidov, A.Fayzullaev.

Nazoratchi: A.Klepikov (Toshkent).


Turnir jadvali

#	Jamoa	O'yin	G'alaba	Durang	Mag'lubiyat	T-N	Ochko
1	Dinamo	29	25	3	1	82-17	78
2	Norin	30	23	3	4	60-26	72
3	Cementchi	28	20	4	4	54-17	64
4	Uz-Dong-Ju	29	17	3	9	62-50	54
5	NBU-Osiyo	28	13	6	9	53-37	45
6	Nasaf-2	29	14	0	15	54-56	42
7	Xorazm	28	11	5	12	49-40	38
8	Nurafshon	28	12	2	14	48-51	38
9	Mashal-2	29	10	7	12	41-53	37
10	Yozyovon-Lochinlari	29	10	3	16	52-71	33
11	Orol	27	10	1	16	63-74	31
12	Lokomotiv-BFK	30	9	4	17	52-64	31
13	Zomin	28	9	4	15	39-51	31
14	Xotira-79	28	9	3	16	46-66	30
15	Paxtakor-2	27	7	6	14	51-49	27
16	G'ijduvon	27	6	5	16	36-88	23
17	Kosonsoy	28	6	3	19	34-59	21