Davron Fayziev: "So'g'diyona" ko'proq 4-3-3 taktikasida o'ynaydi"

-  Bugungi o'yin teng kurashlar ostida boshlandi. “Mashal” jamoasi ishtirokidagi o'yinlarni ko'rib, tahlil qilib o'rganib chiqqan edik. “Mashal” anchagina yaxshi shakllangan jamoa. Ular bejizga oliy ligaga yo'llanmani qo'lga kiritmagan. Biz bugungi o'yingacha yaxshi tayyorgarlik ko'rdik. To'g'ri bazi muammolarimiz ham yo'q emas. Muammo hammada bor. Ular vaqti soati bilan o'z echimini topadi. Menimcha bugun muxlislarga yoqadigan o'yin bo'ldi. SHogirdlarim ko'rsatgan o'yindan 70-80 foizga ko'nglim to'ldi. Lekin natijadan emas. Negaki, hech qaysi murabbiy o'z uyida durrang o'ynashni yoki mag'lub bo'lishni sira ham hohlamaydi.Xavfli vaziyatlar haqida gapiradigan bo'lsam, raqibga nisbatan bizda ko'plab vaziyatlar tashkillashtirdik.

-  Jamoaga yangi qo'shilgan futbolchilarning bugungi o'yindagi harakatlari sizni qoniqtirdimi?

-  Ularning harakatini muxlislar, mutaxassislar uchrashuv davomida kuzatib borishdi. Men ularga baho bera olmayman. Bir narsani ayta olaman: agar men bu yangi futbolchilarga ishonchim bo'lmaganda jamoada olib qolmagan bo'lardim.

-  Bugun ikkinchi bo'limda bir narsa ko'zga tashlandi: futbolchilar ko'p vaziyatlarda so'nggi qarorni qabul qilishda ikkilanib qolishmoqda.

-  Ha, buni o'zim ham kuzatdim. Bunga sabab, bizda yaqqol lider yo'q. O'yin taqdirini hal qila oladigan futbolchi yo'q. Jamoamiz asosan yoshlardan tarkib topgan. Biz asosan bor etiborimizni jamoaviy o'yinga qaratmoqdamiz. Kerakli vaziyatlarda, o'yin davomida futbolchilarga o'zim ko'rsatmalar berib borayapman.

-  Ushbu mavsumda qanday o'yin uslubini qo'llamoqchisiz?

-  Biz ko'proq 4-3-3 taktikasida to'p suramiz. Bu muxlisbop o'yin ko'rsata olishimizga yordam beradi.Futbolda ko'proq gollar bo'lishi kerak. Menga ko'proq shunday yo'nalish yoqadi. Men har doim o'z shogirdlarim o'yin davomida jarohat olguday bo'lsalar, vaqtni cho'zmay , tezroq turib harakat qilishlarini o'qtiraman. Futbolchilar o'zlari ko'rsatgan o'yinidan uchrashuvlardan so'ng rohatlanishlarini xohlayman. Men faqat hujumkor va ochiq futbolni yoqtiraman.