Damir Nizanov: “Neftchi”da meni qo'llab-quvvatlashmoqda”

Fevral oyida Farg'ona viloyati “Hokim kubogi-2016” bahslarida ilk marta farg'onaliklar sharafini himoya qilgan Damir dastlabki o'yinlardayoq murabbiylar nazariga tushdi va 20 yoshli futbolchi bilan shartnoma imzolandi. Biroq yangi mavsum avvalida kutilmagan og'ir elka jarohati Nizanovni safdan chiqishiga sabab bo'ldi va shu tariqa u birinchi davrani o'tkazib yubordi.

Xozirgi paytga kelib esa vaziyat tubdan o'zgargan. Quvonarli tarafi, Damir Nizanov “Neftchi”ning Dukentdagi yig'inida umumiy guruhda shug'ullanmoqda. Biz esa ikkinchi davraga xozirlik ko'rayotgan asli  nukuslik bo'lgan o'yinchi bilan suhbat qurdik.

– Afsuski, birinchi davraning ko'plab o'yinlarini jarohatim sabab o'tkazib yubordim. Xayriyat, barchasi ortda qoldi. Endi mashg'ulotlarda mehnat qilib yana o'zimni ko'rsatishga intilyapman. To'g'ri jarohatdan so'ng yana katta futbolga qaytish biroz qiyin kechmoqda. Lekin barchasi tez orada o'z iziga tushadi deb o'ylaman. Dukent yig'ini ancha qizg'in davom etyapti. Barcha futbolchilar mashg'ulotlarga zo'r berishgan. “Neftchi” murabbiylari jamoani ikkinchi davraga munosib tayyorlashmoqda deb aytib o'tish mumkin. Yashirmayman, ikkinchi davradan umidlarim katta. Yana murabbiylar ishonchini oqlab, farg'onaliklar sharafini munosib himoya qilishga harakat qilaman.

– Jamoada yosh futbolchilarni yakkalatib qo'yishmaydi. “Neftchi”da yaxshi futbolchilar jam bo'lishgan. Himoyachi Husniddin G'ofurov bilan avvaldan do'st edik. Undan tashqari SHukurali Po'latov, O'tkir Yusupov hamda Alisher Samatov singari tajribali jamoadoshlarim xamisha meni qo'llab-quvvatlab kelishmoqda. Oz bo'lsada, farg'onalik muxlislar ko'z o'ngiga to'p surdim. Haqiqatdan ham vodiylik ishqibozlarga teng keladigani yo'q. Ikkinchi davrada  “Neftchi” o'z g'alabalari bilan Farg'ona ahlini xursand qilishiga ishonaman, – dedi Damir Nizanov “Neftchi” PFK rasmiy saytiga bergan intervyusida.