Chiroyli va ishonchli g'alaba. Chorak finaldagi raqibimiz kim bo'ladi?

Islom Ismoilov shogirdlariga rahmat, kecha o'smirlarimiz mezbon Saudiya Arabistoniga qarshi 3-tur o'yinini ajoyib tarzda o'tkazishdi. Bungacha har ikki jamoa keyingi bosqich va Jahon chempionati masalasini hal qilgani bilan kechagi o'yin yuqori tempda kechdi. Har holda raqib jamoa ham g'alabani ko'zlab harakat qilgani shundoq ko'rinib turdi.

Birinchi bo'lim teng kurashlar ostida kechdi. Ikkinchi taym boshida hakam darvozamiz tomon penalti belgiladi, biroq mezbonlar o'yinchisi bu imkoniyatdan foydalana olmadi. Oradan ko'p o'tmay saudiyaliklar qo'pollik ishlatishi natijasida hakam endi mezbon jamoa darvozasi tomon 11 metrlik nuqtani ko'rsatdi. To'p oldiga kelgan 17-raqamli futbolchimiz Jamshidbek Rustamov mo'ljaldan adashmay kuchli va aniq zarba berib hisobni ochdi.

Gol urilganidan 6 daqiqa o'tib vakillarimiz yana to'p kiritishga muvaffaq bo'ldi. Bu paytga kelib 63-daqiqa o'tib borayotgandi va bu safar 22-raqamdagi o'yinchimiz Faridjon Abdullaev farqni ikkitaga oshirdi. 69-daqiqada esa yana Jamshidbek Rustamov o'zini ko'rsatib hisob 3:0 bo'lishini taminladi.

Ikkinchi goldan so'ng mezbonlar o'zlarini yo'qotib qo'ydi. Uchinchi gol esa raqibni umuman "sindirdi". Yakunda ishonchli va chiroyli g'alabani qo'lga kiritdik. Va bizni xursand qilgan yana bir jihat Saudiya Arabistonidan kuchsiz emasligimiz hamda ular bilan tengma-teng o'ynay olishimizni ko'rsatganimiz bo'ldi. Darvoqe kecha 2ta gol urgan Jamshidbek Rustamov Odil Ahmedov futbol maktabi tarbiyalanuvchisi hisoblanadi, Faridjon Abdullaev esa Toshkent shahar akademiyasidan etishib chiqqan.

Ana endi bemalol chorak final haqida o'ylasak bo'ladi. Raqibimiz kimligi esa bugun aniq bo'ladi. Musobaqa reglamentiga ko'ra, biz "A" guruhi peshqadami sifatida chorak finalni "B" guruhida 2-o'rinni olgan jamoapa qarshi o'tkazamiz. O'yin 13 aprel kuni Toshkent vaqti bilan 22:15da start oladi. Narigi guruhda istalgan jamoa ikkinchi o'rinda bo'lib qolishi mumkin, chunki jadvalda murakkab vaziyatga yuzaga kelgan.

Yaponiya 4 ochko bilan peshqadam, BAA 3 ochko bilan ikkinchi o'rinda, Vetnam 2 ochko to'plagan hamda Avstraliya 1 ochko bilan oxirgi o'rinda boryapti. Bu degani hatto oxirgi o'rindagi Avstraliyada ham imkoniyat bor. Bugun "B" guruhda hal qiluvchi 3-tur bahslari start oladi.

10 aprel. 20:00. Yaponiya - Avstraliya
10 aprel. 20:00. Vetnam - BAA

Agar Yaponiya g'alaba qozonsa, unda 1-o'rin bilan keyingi bosqichga yo'l oladi va ular Saudiya Arabistoniga qarshi chorak finalda o'ynaydi. Shunda bizning raqibimiz Vetnam yoki BAA bo'ladi. Maboda Avstraliya yutib qo'ygudek bo'lsa, unda yana chalkash vaziyat vujudga keladi. En yaxshisi, o'yinlarni jimgina kuzatganimiz maqul.

Aslini olganda biz chorak finalda hech kimdan qo'rqayotganimiz yo'q. Ko'z tegmasin, o'yinimiz yaxshi. Futbolchilarimiz ishonch va dadil bilan harakat qilmoqda. Ammo buyog'i har bir bosqich faqat bitta o'yindan iborat bo'ladi va psixologik o'raga tushib qolmasak bo'lgani. Boshqa jamoalarni hurmat qilgan holda shuni aytishimiz mumkin, musobaqadagi eng kuchli jamoalardan birimiz, ammo havolanib ketishga hali erta.

Malumot o'rnida barcha guruhlardagi natijalarni keltirib o'tamiz.

A guruhi - Saudiya Arabistoni, O'zbekiston, Tailand, Xitoy.
3 aprel. 20:00. O'zbekiston - Tailand 4:1
3 aprel. 22:15. Saudiya Arabistoni - Xitoy 2:1
6 aprel. 20:00. Xitoy - O'zbekiston 1:2
6 aprel. 22:15. Tailand - Saudiya Arabistoni 1:3
9 aprel. 22:15. Tailand - Xitoy 0:2
9 aprel. 22:15. Saudiya Arabistoni - O'zbekiston 0:3

B guruhi - Yaponiya, Avstraliya, Vetnam, BAA.
4 aprel. 20:00. Avstraliya - Vetnam 1:1
4 aprel. 22:15. Yaponiya - BAA 4:1
7 aprel. 20:00. Vetnam - Yaponiya 1:1
7 aprel. 22:15. BAA - Avstraliya 2:0
10 aprel. 20:00. Yaponiya - Avstraliya
10 aprel. 20:00. Vetnam - BAA

C guruhi - Janubiy Koreya, Yaman, Afg'oniston, Indoneziya.
4 aprel. 20:00. Janubiy Koreya - Indoneziya 0:1
4 aprel. 22:15. Yaman - Afg'oniston 2:0
7 aprel. 20:00. Indoneziya - Yaman 4:1
7 aprel. 22:15. Afg'oniston - Janubiy Koreya 0:6
10 aprel. 22:15. Janubiy Koreya - Yaman
10 aprel. 22:15. Afg'oniston - Indoneziya

D guruhi - Eron, Tojikiston, Ummon, KXDR.
5 aprel. 20:00. Tojikiston - Ummon 2:1
5 aprel. 22:15. Eron - KXDR 1:1
8 aprel. 20:00. KXDR - Tojikiston 3:0
8 aprel. 22:15. Ummon - Eron 3:2
11 aprel. 22:15. Ummon - KXDR
11 aprel. 22:15. Eron - Tojikiston

X.Xoliqov