"Bunyodkor" bugun BAA yig'inini yakunlaydi

"Qaldirg'ochlar" yig'in doirasida Rossiya klublari bilan 3ta nazorat uchrashuvi o'tkazishdi. "Rostov" (1:1) va "Dinamo" (0:0) bilan o'yinlarda durang natija qayd etilgan bo'lsa, kecha "Spartak" (Moskva) klubiga imkoniyat boy (1:2) berildi. Kechagi o'yinning birinchi bo'limida "Bunyodkor" darvozasini Akbar To'raev qo'riqladi. U 45 daqiqa mobaynida o'z darvozasi daxlsizligini saqlab qoldi. "Spartak"ka qarshi kechgan o'yindan so'ng biz istedodli posbondan qisqacha intervyu oldik.

- Birinchi bo'limda men qo'riqlayotgan darvoza oldida deyarli havfli vaziyatlar sodir etilmadi, - deya so'z boshladi A.To'raev.  Yodda qoladigan faqat bitta vaziyat bo'ldi. Jarima zarbasidan tepilgan to'p to'g'ri qo'limga kelib tushdi. Aksincha, bizning yigitlarda darvozani ishg'ol qilish uchun ko'plab imkoniyatlar bo'ldi. Aleksandr Pishur, Vohid SHodiev va Alibobo Rahmatullaev qulay vaziyatlardan foydalana olishmadi. Birinchi bo'limda o'yin asosan maydon markazida kechdi, desam to'g'riroq bo'ladi.

- "Spartak" klubining ustunligi qay jihatlarda ko'zga tashlandi?
- Rossiya klubi futbolchilari individual mahoratlari evaziga ustunlikka erishishdi.

- Kechagi uchrashuvning "Rostov" va "Dinamo" jamoalariga qarshi o'tkazilgan o'yinlar bilan farqi bo'ldimi?
- Menimcha, yo'q. Nazorat o'yinlarida murabbiylar tomonidan turli taktikalar sinab ko'riladi. SHu bois, o'yinlar natijasiga jiddiy etibor qaratilmaydi.

- Bugun kechki mashg'ulotlar bormi?
- Yo'q. Bugun ertalab trenajyor zalida ishladik. SHu bilan BAA yig'ini yakuniga etdi. Barcha mashg'ulotlar avvaldan belgilangan reja asosida o'tkazildi. Yig'inni bemalol muvaffaqiyatli o'tdi, deb aytish mumkin. Ertaga kunning ikkinchi yarmida Toshkentga qaytamiz.