Bugun futbol. "So'g'diyona" - "Paxtakor"
03 noy 2017 14:45
Yangiliklar
![](https://championat.asia/upload/storage/286699_original.jpg)
![](/upload/storage/286699_220.jpg)
Bugun futbol. "So'g'diyona" - "Paxtakor"
Jamoalar oldida turgan vazifa ikki xil: "Paxtakor" ikkinichi o'rin uchun kurash olib borayotgan bo'lsa, "So'g'diyona" oliy ligada qolish uchun harakat qilmoqda. Kelasi yil oliy ligada 12ta klub qolishini hisobga olsak, hozirda "So'g'diyona"ni 11-o'rindagi "Qizilqum" bilan atigi ikki ochko ajratib turibdi va bundan ko'p vahima yasamasa ham bo'ladi.
"Paxtakor"ga kelsak, bu jamoa ikkinchi davrada qattiq start oldi. Jamoa Kubokdan chiqib ketgach, Osiyo chempionlar ligasida o'ynash uchun oldinda faqat bitta yo'l qolgan: chempionatni ikkinchi o'rinda tugatish. SHu bois "Paxtakor" uchun har bir bahs muhim. Ajablanarlisi shundaki, "Paxtakor" ketma-ket uch uchrashuvda g'alaba qozongan bo'lsa-da, har uchala o'yinidan keyin hakamlar bilan bog'liq gap-so'zlar yuzaga keldi.
Bilasizmi? "So'g'diyona" ikkinchi davrada faqat ikki bor g'alaba qozongan. Jamoa Toshkentda "Obod"ni va o'z maydonida "Metallurg"ni mag'lub etgan. SHunday bo'ldiki, "So'g'diyona" qatorasiga to'rt uchrashuvda durang qayd etdi. Jamoa o'tgan turda G'uzorga borib, 1:3 hisobida mag'lub bo'lib qaytdi.
Fakt: SHota Arveladze boshchiligidagi "Paxtakor" ikkinchi davrada atigi bitta uchrashuvda mag'lub bo'ldi. Bu hodisa safarda "Navbahor"ga qarshi bahsda ro'y berdi. Bungacha jamoa ketma-ket to'rt o'yinda g'olib chiqqandi.
O'yinni kim boshqaradi? Bu uchrashuvni Temur To'xtasinov boshchiligidagi hakamlar brigadasi boshqaradi. Andijonlik hakam ikkinchi bor "So'g'diyona" va "Paxtakor" ishtirokidagi o'yinda ishlaydi.
Bu To'xtasinovning Jizzaxga ikkinchi safari bo'ladi. Birinchisida "So'g'diyona" o'z maydonida "Loko"dan mag'lubiyatga uchragandi. Bundan tashqari, To'xtasinov "Paxtakor"ning safardagi bahsida ilk marta ishlaydi. U Toshkentda bo'lib o'tgan "Paxtakor" - "Mashal" o'yinini boshqargan.
O’xshash yangiliklar
![AMP Logo](https://championat.asia/image/logo-amp.png)
Fikrlar