Bugun futbol. "Qo'qon-1912" - "Buxoro"

18:00 - Qo'qon-1912 (Qo'qon) – Buxoro (Buxoro)
Hakamlar: H. Ro'ziev (Toshkent), O. Abduvasilov (Toshkent), S. SHoyusupov (Toshkent), SH. Nasibullaev (Namangan)
Nazoratchi: R. Serazetdinov (Toshkent).
O'zPFL vakili: B. Haydarov.

O'yindan nima kutyapmiz? Turnir jadvalida yonma-yon o'rinlarda borayotgan jamoalarning o'zaro qarama-qarshiligi.  "Qo'qon-1912" 20 ochko bilan uchinchi, "Buxoro" esa 17 ochko bilan to'rtinchi o'rinda bormoqda. Bugun nafaqat ikkala jamoa, balki yosh murabbiylarning ham o'zaro "to'qnashuviga" guvoh bo'lamiz. Mazkur bahsda kim g'alaba qozonishi haqida bir narsa deyish qiyin.

Fakt: "Qo'qon-1912" o'z maydonida faqat bitta uchrashuvda mag'lub bo'lgan. No'mon Hasanov shogirdlari 1-turda "Nasaf"ga yutqazib qo'yishgan. Keyingi o'yinlarda esa jamoa uch marta g'alaba qozonib, ikki bor durang o'ynagan. To'plar nisbati 9-5. Qo'qonliklar uy uchrashuvlarida 11 ochko to'plagan.

Bilasizmi? "Qo'qon-1912" oxirgi uchta o'yinni durang bilan yakunladi. Eng qizig'i, uchalasi ham 1:1. "Qo'qon-1912" "Paxtakor", "Navbahor" va "Lokomotiv" bilan kechgan bahslarda g'alabaga erisha olmadi, shuningdek mag'lub bo'lmadi ham.

Fakt: "Buxoro" safardagi ikkita bellashuvda g'alaba qozongan va olti ochkoni qo'lga kiritgan. To'plar nisbati 6-8. Bu jamoa safarda hali durang o'ynamagan, qolaversa uchta o'yinda mag'lub bo'lgan.

Bilasizmi? "Buxoro" oxirgi ikki o'yindan beri yuta olmayapti: bir durang va bir mag'lubiyat.  Ulug'bek Baqoev shogirdlari safarda "Paxtakor"ga imkoniyatni boy berib, uyda "Navbahor" bilan 3:3 o'ynashdi.