Bugun futbol. "Qizilqum" - "Lokomotiv"

Turnir jadvalida 37 ochko bilan ikkinchi o'rinda borayotgan "Lokomotiv" Navoiyda "Qizilqum" mehmoni bo'ladi. "Qizilqum" hisobida 18 ochko mavjud bo'lib, bu jamoa turnir jadvalida oxirgi o'rinni egallab turibdi. 

Bugungi bellashuv har ikki jamoa uchun muhim. Negaki "Loko" ikkinchi o'rinni saqlab qolish uchun kurashayotgan bo'lsa, "Qizilqum" xavfli zonani tark etish maqsadida bahs olib boradi. SHu bois ham bugun Navoiyda qiziqarli to'qnashuv kechishi kutilyapti. 

Ikkinchi davra boshlanganidan beri "Loko" safarda g'alaba qozongani yo'q. Jamoa oxirgi marta birinchi davraning 10-turida "Nasaf"ni 1:0 hisobida mag'lub etib qaytgan. SHundan beri "temiryo'lchilar" safarda beshta o'yin o'tkazib, ikki bor mag'lubiyatga uchrashdi va uch marta durang qayd etishdi. 

"Lokomotiv"ning oxirgi uch o'yini durang natija bilan yakun topdi. Uyda "Metallurg", safarda "Bunyodkor" va "Qo'qon-1912" jamoalari bilan 1:1 hisobi qayd etildi.

"Qizilqum"ga kelsak, bu jamoa ikkinchi davra startidan beri faqat ikkita bellashuvda zafar quchdi. Navoiyliklar ham oxirgi uchta o'yinda g'alaba qozona olishmadi. Jamoa "Surxon" va "Bunyodkor"ga imkoniyatni boy berib, o'z maydonida "Nasaf" bilan durang o'ynadi. 

Navoiyda kechgan oxirgi 5 uchrashuv

2018. "Qizilqum" - "Lokomotiv" 0:3

2017. "Qizilqum" - "Lokomotiv" 0:2

2016. "Qizilqum" - "Lokomotiv" 0:1 

2015. "Qizilqum" - "Lokomotiv" 0:2 

2014. "Qizilqum" - "Lokomotiv" 2:3

Navoiyda bo'lib o'tgan oxirgi beshta uchrashuvning hammasida "Lokomotiv" g'alaba bilan qaytgan. "Qizilqum" o'z maydonidagi oxirgi to'rt o'yindan beri "Loko"ga gol ura olmayapti. Bu mavsum birinchi davrada bo'lib o'tgan bahsda ham "Loko" g'alaba qozongan - 3:1.