Bugun futbol. "Obod" - "Paxtakor"

"Obod"ning oliy ligadagi ahvoliga havas qilib bo'lmaydi. Bu jamoa 14ta o'yindan so'ng 9 ochko to'plagan holda oxirgi o'rinda bormoqda. "Paxtakor" esa 21 ochko bilan 5-o'rinni egallab turibdi.

Bugungi o'yinda hech shubhasiz "Paxtakor" favorit, lekin boshqa tomondan "Paxtakor" safarda hali g'alaba qozonmagan va bu narsa ularga bosim o'tkazishi mumkin. "Obod" bugun o'z maydonida ettinchi o'yinini o'tkazadi. Avvalgi bellashuvlarda Rauf Inileev shogirdlari faqat bir marta g'alaba qozonishgan. "Obod" o'z maydonida "Dinamo"dan ustun kelgan. SHuningdek, bu jamoa uch marta durang o'ynab, ikki bor mag'lub bo'lgan. To'plar nisbati 7-9.

Aytib o'tganimizdek, "Paxtakor" hali safardagi birorta o'yinni yutmagan: uch durang va uch mag'lubiyat. To'plar nisbati 2-10. Ko'rib turganingizdek, "Paxtakor" safar o'yinlarida atigi ikkita gol urgan. Agar "Paxtakor" bugun "Jar"da g'alaba qozonsa, bu "Paxtakor"ning safardagi ilk uch ochkosi bo'ladi. Mabodo "Obod" zafar quchsa, bu Inileev shogirdlarining uydagi ikkinchi g'alabasi bo'ladi.