Birinchi zarbda belgacha, ikkinchi zarbda tizzagacha

Umumiy hisobda jamoa joriy mavsum 3ta o'yinda darvozasidan 5ta to'p olib chiqdi. Ushbu holat nimani anglatadi? Albatta himoyadagi va orqa chiziqdagi muammolarni. Demak bugun "Lokomotiv"ning "Bunyodkor"ga qarshi o'yini va himoyadagi muammolarini tahlil qilishga urinib ko'ramiz. 

Dastlabki vaziyat 

O'yindan keyin ham SHuhrat Maqsudovga aytganimdek "Bunyodkor" birinchi bo'limda o'ziga hos bo'lmagan uslubda harakat qildi. Yani ko'proq uzun paslar va kesiq uzatmalar orqali raqib himoyasini yorib kirish payida bo'ldi. 21-daqiqa o'tib borayotgan pallada mezbonlarning ganalik vingeri Franisiz Narx chap qanotda to'pni markazga intilayotgan Umarali Rahmonalievga uzatdi. Bu erda birinchi xato Alisher Salimovda.  U Narxga qarshi juda sekin o'ynadi va natijada futbolchi to'pni ichqariga osonlikcha uzatdi.  

To'pni qabul qilib olgan Umarali birinchi urinishda Rashidxonov qarshiligin engib zarba berdi. O'sha vaziyatga yaqin turgan Samuel Ope hushyorlikni yo'qotdi. Ope shu kuni pozicion jihatdan ko'p xatolarga yo'l qo'ydi. Ikkinchi bo'limda uning o'rniga Jaloliddin Jumaboev tushirildi. 

Ikkinchi vaziyat

Birinchi bo'limga hakam tomonidan qo'shib berilgan daqiqalarda o'yindagi ikkinchi keskin vaziyat yuzaga keldi. Ushbu vaziyatda yana ganalik futbolchi Narx faollik ko'rsatdi. Markazdan berilgan uzun pasni bir urinishda Tomivaga oshirib berdi. Nigeriyalik forvard Islom Qobilovni osonlikcha aldab darvozaga xotirjam zarba yo'lladi. Bunda xato yana Ope va Qobilovda. Islom bir o'zi qarshilik ko'rsatishga urinib ko'rdi. Ope esa jarima maydonchasiga kech etib keldi. 

Uchinchi vaziyat va gol 

Bunday xatolar ohir oqibat golga olib kelishi kutilayotgandi. Boz ustiga maydon egalari ikkinchi bo'limda o'z uslublariga o'tgach "Lokomotiv" futbolchilari yanada qiynalishdi. Ilk gol penaltidan urildi. Xo'sh aslida penalti bor edimi? Alisher Salimov to'p uchun kurashda Suhrob Izzatovga nisbatan "kontakt" ishlatdi. Uning teginishi oqibatida Izzatov muvozanatni yo'qotdi. O'FA hakamlar bo'limining xulosasi esa shunday bo'ldi: "Uchrashuvning 58-daqiqasida «Bunyodkor» futbolchisi raqib jarima maydoni ichiga kirgan vaqtda himoyachi oyog'ining pastki qismiga zarba berdi. Bosh hakam bu vaziyatda avval o'yinni davom ettirishni ko'rsatdi, biroq VAR hakamlari holatni o'rganib chiqqach, vaziyatni takroran ko'rishni taklif qilishdi. Bosh hakam vaziyatni ko'rgach, penalti belgilandi. Mutaxassislar fikriga ko'ra, VAR yordamida qabul qilingan qaror to'g'ri bo'ldi". 

Superliganing bugungi ikki o'yiniga O'FA hakamlar bo'limining xulosalari

To'rtinchi vaziyat 

Bunda mehmonlarning mudofaa chizig'idagi muammo yaqqol sezildi. "Bunyodkor" yarim himoyachisi Rasul Yo'ldoshev ikkita markaziy himochining o'rtasidan to'pni Usmonali Ismonalievga uzatdi. "Loko"ning ikki himoyachisi suniy o'yindan tashqari holatni keltirishda xato qilishdi. Usmonalining pasini Tomiva golga aylantirdi. 

"SHum bola" filmida aytilganidek, birinchi zarbda belgacha, ikkinchi zarbda tizzagacha.  AGMK avvalgi turda mana shu xatolardan foydalana olmadi. O'shanda ham Haqnazariyda juda yaxshi imkoniyatlar yuzaga kelgandi. "Bunyodkor" esa "temiryo'lchilar" to'rini ikki bor "teshdi".