Birinchi liga, "SHarq". May oyining eng yaxshi o'yinchisi - Isroil Tursunov

Endigi navbat birinchi liganing "SHarq" mintaqasida ishtirok etayotgan o'yinchilarni aniqlash. "SA" talqiniga ko'ra, may oyining eng yaxshi o'yinchisi Isroil Tursunov bo'ldi!

Zukko o'quvchilarimiz yaxshi bilishsa kerak, "Istiqlol"ning ushbu hujumchisi aprel oyida ham eng yaxshi o'yinchi bo'lgandi. Saytimiz ijodkorlari may oyida ham eng yaxshi deb yana Tursunovni munosib ko'rdi. Ushbu hujumchi ortda qolgan oy davomida jamoasi uchun 7ta gol kiritdi. Albatta o'rtamiyona jamoa safida o'ynab ham raqiblar darvozasini 7 bor ishg'ol etish yaxshi natijadir. Qolaversa andijonlik futbolchi "SHarq" mintaqasida to'purarlar ro'yxatini boshqarib turibdi.

Keyingi o'ringa "Xotira-79" posboni Lochin Dolimovni qo'ydik. CHunki bu yil peshqadamlarga jiddiy tashvish tug'dirayotgan Uychi jamoasi tarkibida Dolimov munosib o'yin ko'rsatmoqda. "Xotira-79" may oyida o'tkazilgan 6ta bahsda 3ta to'p o'tkazib yuborganini ko'ramiz. SHundan bittasi aynan Dolimov o'ynagan uchrashuvda kiritilgan. To'g'ri, kam gol o'tkazayotgan "Xotira-79"da faqat darvozabonlarnigina maqtab bo'lmaydi. Ularning oldida turgan mudofaa chizig'i vakillari ham puxta o'ynayotganiga urg'u berib o'tish kerak. Jamoada Maqsud Hayitov, Bahrom Yuldashev singari oliy liga saviyasidagi himoyachilar bor ekan, tabiiyki bu darvozabonlarga ham engillik tug'diradi.   

May oyining eng yaxshi o'yinchisi uchligini Abdurazzoq Jo'raev yakunlab berdi. "Kosonsoy" hujumchisida ham tajriba katta ekanligi bois birinchi ligada o'zini ko'rsatishga erishmoqda. Ilgari oliy liga klublari sharafini himoya qilgan namanganlik futbolchi joriy mavsum "Kosonsoy" muvaffaqiyatlariga katta xissa ko'shib kelmoqda. Jo'raev may oyida raqiblar darvozasiga 6ta to'p kiritdi. Bu har bir o'yinga o'rtacha bittadan gol demakdir.  

May oyining eng yaxshi o'yinchisi
1. Isroil Tursunov - "Istiqlol"
2. Lochin Dolimov - "Xotira-79"
3. Abdurazzoq Jo'raev - "Kosonsoy"