Bir o'yin tarixi. O'zbekiston - Qatar 4:0. Farhod Tojievning benefisi. Qosimov Inileev uchun revansh oldi

Bugun tarixdagi Qatarga qarshi kechgan eng yorqin va yirik hisobdagi g'alabali o'yinni yodga olamiz. Gap JCH-2010 saralash bosqichidagi Toshkentda kechgan uchrashuv haqida ketmoqda. O'sha bosqichda terma jamoamizni ikki nafar murabbiy boshqargan. Rauf Inileev bilan boshlangan saralash turniri Mirjalol Qosimov bilan tugagan edi. Qatar bilan bahsga esa aynan Mirjalol Qosimov bosh murabbiy sifatida boshlab tushgan. Dohada kechgan bahsda Brunu Metsyu "brigadasi" 3:0 hisobida g'alabani tantana qilganini yodingizda bo'lsa kerak. Toshkentda kechgan javob o'yini mart oyining 28 sanasida o'tkazilgan bo'lib, shu kuni "Paxtakor" stadionida minglab ishqibozlar jamlagan edi, deya olamiz. Farhod Tojiev o'zining xet-trigi bilan muxlislarni xursand qilgan bo'lsa, yana bir golga Anvar Soliev mualliflik qilgan. 

JCH-2010 saralash bosqichi. 

O'zbekiston - Qatar 4:0

Toshkent. "Paxtakor" stadioni. 

Bosh hakam: Masud Moradi

Gollar: Farhod Tojiev 34, 45+2, 53, Anvar Soliev 62

O'zbekiston: Ignatiy Nesterov, Hayrulla Karimov, Anvar G'ofurov, Sahob Jo'raev, Islom To'xtaxo'jaev (Stanislav Andreev), Server Jeparov (Timur Kapadze,46) Odil Ahmedov, Viktor Karpenko, Jasur Hasanov, Maksim SHackix (Anvar Soliev, 56) Farhod Tojiev

Zaxiradagilar: Aziz Ibragimov, Ilhom Suyunov, Temur Jo'raev, Vitaliy Denisov

Yakuniy hal qiluvchi raundda biz bilan birga guruhda Avstraliya, Yaponiya, Baxrayn ham o'rin olgan, JARdagi mundialga esa Avstraliya va Yaponiya to'g'ridan to'g'ri yo'llanmani qo'lga kiritgandi. Terma jamoamiz esa 4 ochko bilan so'nggi o'rinni egallagan, qaysidir manoda inqiroz yuzaga kelgan davrlar. Biz yodga olgan o'yin esa o'sha saralashdagi vakillarimizning yagona g'alabasi va xursandchiligi sifatida hamon eslanadi. 

Fotosuratlar uchun Hasan Pirmuhammedovga minnatdorchilik bildiramiz