Bir o'yin tarixi. "Liverpul" - "Milan" 3:3 yoxud "Istanbul mo'jizasi"

Hal qiluvchi bahsga Italiyaning "Milan" hamda Angliyaning "Liverpul" klublari etib kelishadi.

"Rossonerlar" ustozi Karlo Anchelotti final qaydnomasiga hujumchi Filippo Indzagi kiritmaydi. "Liverpul" bosh murabbiyi Rafael Benites esa asosiy tarkibga kutilmaganda Xarri Kyuellni kiritadi va Ditmar Xamann zaxirada qoldiriladi.

Uchrashuvda juda tezkor gol uriladi. Ilk soniyalardan oldinga o'tgan Kaka yiqitiladi, jarima to'pini Andrea Pirlo amalga oshiradi va tajribali himoyachi Paolo Maldini hisobni ochadi - 1:0.

Keyingi gol 39-daqiqada yana italiyaliklar tomonidan uriladi. Andrey SHevchenkoning uzatgan to'pini argentinalik Ernan Krespo darvozaga yo'llaydi - 2:0.

Birinchi taym so'nggida Krespo birga-bir vaziyatga chiqib boradi va to'pni Dudekning ustdan darvozaga tashlab qo'yadi - 3:0. "Liverpul" nokautga uchradi, deb o'ylagandi hamma...

Ikkinchi taym boshida "Istanbul mo'jizasi" ro'y beradi. "Liverpul" futbolchilari qandaydir 6 daqiqa ichida uchta gol urishadi! 54-daqiqada Stiven Jerrard chap qanotdan uzatilgan to'pni boshi bilan Dida qo'riqlayotgan darvozaga joylab qo'yadi - 3:1. Ikki daqiqa o'tgach Vladimir SHmicer uzoq masofadan ajoyib gol uradi - 3:2. 60-daqiqada Jennaro Gattuzo o'z jarima maydoni ichida Stiven Jerrardni yiqitgani uchun bosh hakam Manuel Mexuto Gonsales penalti belgilaydi. Xabi Alonso 11 metrli jarima to'pini amalga oshiradi, Dida to'pni qaytaradi, ammo qaytgan to'pni Alonsoning o'zi darvozaga yo'lladi - 3:3.

O'yindan keyin turli nashrlarda "Liverpul" ustozi Rafael Benites tanaffus vaqtida futbolchilarga hech qanday ko'rsatma bermagan, shunchaki kiyim almashtirish xonasi oynasini ochib qo'ygani yozilgandi. U erdan stadionga kelgan "Liverpul" muxlislarining "You'll Never Walk Alone" ("Sen hech qachon yolg'iz qolmaysan") qo'shig'i eshitilib turgan...

Uchrashuvning asosiy va qo'shimcha vaqtlarida hisob o'zgarmaydi. G'olibni aniqlash uchun penaltilari seriyasiga murojaat qilinadi. Unda nimalar bo'lganini yaxshisi quyidagi videoda tomosha qiling:

"Milan" - "Liverpul" 3:3
25 may 2005 yil. Istanbul, "Otaturk" stadioni. 69000 tomoshabin.
Gollar: Maldini 1, Krespo 39, 44 - Jerrard 54, SHmicer 56, Xabi Alonso 60.
Bosh hakam: Manuel Mexuto Gonsales (Ispaniya).

"Milan": Dida, Kafu, Yap Stam, Alessandro Nesta, Paolo Maldini, Andrea Pirlo, Jennaro Gattuzo (Ruy Koshta, 112), Klarens Zeedorf (Serjino, 86), Kaka, Andrey SHevchenko, Ernan Krespo (Yon Dal Tomasson, 85).
Bosh murabbiy: Karlo Anchelotti (Italiya).

"Liverpul": Eje Dudek, Stiv Finnan (Ditmar Xamann, 46), Jeymi Karrager, Sami Xyupiya, Jimi Traore, Xabi Alonso, Luis Garsiya, Stiven Jerrard, Yon Arne Riise, Xarri Kyuell (Vladimir SHmicer, 23), Milan Barosh (Jibril Sisse, 85).
Bosh murabbiy: Rafael Benites (Ispaniya).

Ogohlantirishlar: Karrager 75, Barosh 81.