"Barselona" - "Real". Prevyu
06 fev 2019 12:19
Yangiliklar

"Barselona" - "Real". Prevyu

Bugun tunda Kataloniyada Ispaniya kubogi yarim finali dastlabki uchrashuvi bo'lib o'tadi.

Unda mamlakatning eng kuchli ikki klubi "Barselona" va "Real" to'qnash keladi.

"Barselona" — "Real"
Stadion: "Kamp Nou" (Barselona).
Bosh hakam: Mateu Laos.
Boshlanish vaqti: 01:00 (Toshkent)

"Real" ham, "Barselona" ham yarim finalda bir-birlariga to'qnash kelmaslikni istashgandi, ammo qura shunday tushdi. SHunday tig'iz grafik vaqtida kuchli raqibga qarshi o'ynashni hech kim xohlamaydi. Masalan, "Real"ni "Barselona"ga qarshi o'yindan so'ng "Atletiko" va "Ayaks"ga qarshi safardagi o'yinlar kutib turibdi. Kataloniyaliklar esa 19 fevraldan 2 martga qadar ketma-ket to'rtta (!) safardagi uchrashuvda ishtirok etishadi ("Lion", "Sevilya" va ikki marta "Real"). Hech kim havas qilmaydigan taqvim.

So'nggi "El Klasiko" "Real" uchun juda yomon tugagandi. Poytaxt klubi 1:5 hisobida taslim etilgan va bosh murabbiysiz qolgandi. O'shanda kataloniyaliklar safida Leo Messi maydonga tushmagan edi.

"Real"ning taxminiy tarkibi quyidagicha: Darvozani Keylor Navas qo'riqlaydi, qanotlarda Dani Karavxal va Marselo o'ynaydi. Markaziy himoyada Serxio Ramos va Varan tandemi harakat qiladi. Katta ehtimol bilan Toni Kroos maydonga tushadi va Dani Sebalos dam oladi. Yarim himoyada unga Modrich va Kazemiro yordam beradi.

Hujumda Benzema, o'ngda Vaskes o'ynashi aniq. CHapda Vinisius yoki Beyl o'ynashi mumkin. Aytgancha Vaskes haqida. Xayron qolmang, Solari taktikasida Lukas eng muhim futbolchi va bugun ilk daqiqalardan maydonga tushadi. Birinchi sabab — uning charchab qolmagani, ikkinchisi — himoyaga yordam bera olish imkoniyati. Lukas Xordi Albani zararsizlantirish borasida mahsus topshiriq oladi.

"Barselona"ning taxminiy tarkibi esa ko'p savollar tug'diradi. Valverde uchun asosiy muammolar Messining jarohati va Dembelening anginasi. Usmon bugun maydonga tushmasligi aniq, Leo borasida qaror bugun qabul qilinadi. Ernesto tavakkalga boradimi? Balki, etakchiga dam berib unga qo'shimcha xordiq olish imkoniyatni yaratib berar? Boshqa chiziqlarda muammo yo'q. Agar Messi o'ynamasa uning o'rniga kim tushadi? Bunday holatda hujumda Koutino-Suares-Alenya triosi harakat qilishi mumkin. Boateng va Malkom asosiy tarkib o'yinchilari emas.

Jamoalarning oxirgi o'yinlari:
25.10.18, La Liga, Barselona - Real 5:1
06.05.18, La Liga, Barselona — Real 2:2
23.12.17, La Liga, Real — Barselona 0:3
17.08.17, Ispaniya Superkubogi, Real - Barselona 2:0
13.08.17, Ispaniya Superkubogi, Barselona — Real 1:3

Taxminiy tarkiblar:

"Barselona": Ter SHtegen, Serxi Roberto, Lengle, Pike, Alba, Rakitich, Buskets, Artur, Alenya, Luis Suares, Koutino

"Real Madrid": Keylor Navas, Karvaxal, Varan, Ramos, Marselo, Kroos, Kazemiro, Modrich, Vaskes, Benzema, Vinisius.

Jarohat olganlar: Rafinya, Sillessen, Umtiti, Dembele — Valexo

So'roq ostida: Messi ("Barselona")

Qiziqarli faktlar:

- "Real" va "Barselona" oxirgi o'zaro 27ta o'yindan 24tasida 3tadan kam gol urishmagan.

- "Real" Ispaniya Kubogi doirasidagi 38ta o'yinning 34tasida yutqazmagan.

- "Real"ga qarshi oxirgi 3ta o'yinda "Barselona" kamida ikkitadan gol urgan.