Anvar G'ofurov: “Navbahor”ga ham, bizga ham 3 ochko suv va havodek zarur”

Ushbu uchrashuvda “qaldirg'ochlar” “Obod” klubini yirik (3:0) hisobida mag'lub etishdi. Mag'lubiyatdan so'ng “Obod” jamoasi himoyachisi Anvar G'ofurov o'yin haqida o'z fikrlari bilan o'rtoqlashdi.

“Bunyodkor”ga qarshi o'yinda mag'lubiyatga uchradik. Menimcha, tajriba va mahorat ustun keldi deb o'ylayman. Penalti borasida hech nima deya olmayman. Hakam qaror qabul qilib bo'ldi, men uni muhokama qilmayman. Sobiq jamoamga qarshi maydonda to'p tepganimdan bir tarafdan xursandman yana bir tarafdan esa biroz qiynaldim. To'g'ri, shuncha yil “Bunyodkor” safida o'ynab turib, biroz vaqt o'tgandan so'ng ushbu jamoaga qarshi bahs olib borish juda ham og'ir. Lekin, boshqa tarafi, men hozir “Obod” jamoasida to'p tepyapman. Demak, shu klubni sharafini himoya qilyapman.

“Bunyodkor”ga qarshi bor kuchim bilan o'ynadim va jamoamga foyda keltirishga harakat qildim. Keyingi o'yinda bundanda ko'proq kuch sarflash kerak bo'ladi. CHunki, “Navbahor”ga ham bizga ham 3 ochko suv va havodek zarur. Biz turnir jadvalida oldimizda va biz keyingi pog'onada turgan jamoalarni mag'lub etsak juda yaxshi ish bo'lar edi. “Bunyodkor” jamoasini olib qaraydigan bo'lsak, hozir turnir jadvalida peshqadamdan keyingi o'rinda bormoqda. OCHLda ham muntazam ravishda ishtirok etib keladi. Juda ham yaxshi shakllangan jamoa. “Qizilqum” ham ayni damda yaxshi o'rinda bormoqda. “Buxoro” bilan bo'lgan o'yinda safarda ochko yo'qotib qaytdik. Ushbu jamoalarga qarshi o'ynash juda qiyin. “Metallurg” bilan bo'lgan o'yinda 1 ochkoni qo'lga kiritdik. 3 ochkoni qo'lga kiritishimiz ham mumkin edi. Mag'lubiyatdan so'ng ichki muhitni unchalik alo darajada deb bo'lmaydi. Keyingi turda “Navbahor”ni mag'lub etib ichki muhitni ham yaxshilab olamiz. Uchralgan mag'lubiyatlardan hulosa chiqarib keyingi o'yinda g'alaba qozonishga urinib ko'ramiz. Nasib qilsa oliy ligada qolishga harakat qilamiz”, - deydi “Obod” klubi futbolchisi Anvar G'ofurov.

Jahongir Sotvoldiev