Anvar G'ofurov: "Murabbiylar shtabida Zeytullaevning paydo bo'lishi? Maqsadimiz – "Bunyodkor"ni yuqoriga ko'tarish"

"Ko'rganingizdek qiyin o'yin bo'ldi. Raqib yaxshi himoyalandi. Birinchi bo'limdan so'ng ko'rsatmalarni o'zgartirishga harakat qildik. Tezroq paslar bilan to'pni jarima maydonchasi ichiga etkazib berishni aytgandik. Raqib yaxshi tayyorgarlik ko'rgan ekan. Maqsadiga erishdi. Yana bu safar ham uchinchi zonada muammoimiz bo'lyapti. Biz yanada ko'proq imkoniyat yaratishimiz zarur. Birinchi bo'limda o'rtadan hujumlarni olib bordik. Qanotlardan yorib o'tish kerakligini takidlagandik. Ularning taktikasi qarshi hujumda vaziyatni kutish edi. Vaziyatlardan foydalana olmadik. Balki futbolchilar ko'rsatmalarni oxirigacha tushunishmagandir. Ishlashimiz uchun ko'proq vaqt kerak. Bir deganda o'xshamaydi. To'pni nazorat qilyapmiz. Oxirgi vaziyatda sovuqqonlik etishmayapti Bu o'yinga biroz yuklama bilan tushdik. Keyingi o'yinlarda yanada yaxshiroq harakat qilamiz. Qolaversa, omad ham kerak" - deydi Anvar G'ofurov

- Bugun tarkibda rotaciyalarga qo'l urdingiz. Lekin ko'rinib turibdiki rotaciya qilish uchun resurslar etarli emas. Ular o'yinga tayyor emasdek ko'rindi. Bu borada qaroringiz qanchalik to'g'ri bo'ldi?

- Baribir har bir futbolchiga imkoniyat berishimiz lozim. Biz yaxshi bo'lishi tarafdorimiz. Bu o'yinlarda imkon bermasak, qachon beramiz? Lekin maydonda 11 ta joy bor. Yigitlar buni to'g'ri qabul qilishi kerak. Biz ham ularga imkoniyat berishga harakat qilamiz. Ammo bizga natija zarur deb o'ylayman.

- Yarim himoyachilarning harakatini qanday baholaysiz? Hisob 0:0, lekin yarim himoyachilar maydonda piyoda yuribdi. Buning natijasida hujumchilarda ham vaziyat bo'layotgani yo'q...

- To'g'ri. Birinchi bo'limda yaqqol orqada o'ynaydigan Frane CHiryak va Amir To'raqulov bor edi. Ikkinchi bo'limda CHiryakning o'rniga tezkor Bilol To'plievni tushirdik. U yuqoriroqda o'ynay oladi. To'pni qabul qilib, yaxshi vaziyatlar yaratishi mumkin. Bizga tezlik kerak edi. Bu tezlikni Umid Sultonov beradi degan maqsadda uni qo'ydik.  

- Ilyos Zeytullaev murabbiylar shtabida paydo bo'ldi. So'nggi 3 kunda bu haqida ko'p gapirildi. Uning jamoaga jalb qilinishi kimning qarori?

- Savolingiz noo'rin deb o'ylayman. Birlashgan holda "Bunyodkor"ga yordam berish istagidamiz. Maqsadimiz – yagona. Barchamiz jamoaga ko'mak bergan holda yuqori o'rinlarga olib chiqishni ko'zlaganmiz.

- O'z vaqtida eng yaxshi to'purarlarga qarshi o'ynagansiz. Hozirgi mahalliy hujumchilarga nima etishmayapti?

- Zamon shunday. Har bir to'purar o'zini ko'rsatsa, xorijdan taklif tayyor. Sergeev, Abdixoliqov va hokazo. Bizda iqtidorli yaxshi hujumchilar bor. Jamoalarning maqsadlari katta. Imkoniyatlariga qarab xorijdan yaxshi saviyadagi hujumchilar olib kelishlari kerak