Andres Inesta: Barselona futbolchisi bo'lish oson emas

- Andres Inesta qanday inson?

- Futbolchi. Butun hayotim davomida o'sishga, jamoadoshlarimdan nimanidir o'rganishga, eng yaxshi bo'lishga va sovrinlar yutishga harakat qildim.

- Barselona safida 600dan ko'proq o'yin o'tkazdingiz. Ushbu natija siz uchun qanday ahamiyat kasb etadi?

- Bu ko'p yillar davomida tinimsiz mehnat qilganim, murabbiylar ishonchini oqlaganim bilan bog'liq. Har yili yangi darajaga chiqdim. SHu maqsadda o'z ishimga jiddiy yondoshdim. Barselona futbolchisi bo'lish osonmas.

- Klub safida 767ta o'yin o'tkazgan Xavining rekordini yangilamoqchimisiz?

- Bir narsa deyish qiyin. Kelajakda nima bo'lishini oldindan aytib berolmaysiz. Har qanday vaziyatda zaxira o'yinchisiga aylanib qolish hech gap emas. Umid qilamanki, shu ruhda davom ettiraman. Ko'ramiz, qanchalik uzoqqa borarkanman. Bugungi kunda holatim juda yaxshi. Asosiysi ham shu. Umuman olganda, ertangi kunni o'ylamayman.

- Rahbariyat faoliyatingizni Barselonada tugatishingizni istamoqda.

- Hamisha rahbariyat bilan muloqotda bo'lib turamiz. Necha marta ketishim mumkin edi. Bu muhim emas, eng avvalo, o'sha Inesta bo'lib qolishim lozim. Agar jamoaga yordam bera olmasligimni his qilsam, shu zahoti ketaman. Tabiiyki, asosiy tarkibdagi o'rnimni saqlab qolish oson kechmaydi. CHunki ilgarigidek yosh emasman, 32ga to'ldim. SHunga qaramay, maqsadim katta. Yana qanchalik uzoqqa borishim mumkinligini bilmayman. CHunki boshqa jihatlarni ham inobatga olish lozim. Umid qilamanki, yuqori saviyada hali ko'p o'ynayman.

- Kelajakda kim bo'lmoqchisiz: sport direktori, rahbar yoki murabbiy?

- Taqdir nima tayyorlab qo'yganini bilmayman. Bugun futbolchiman. SHunday ekan, hozir faqat shu haqda gapiraman. Agar faoliyatimni yakunlaganimdan so'ng klubda ish taklif qilishsa, bajonidil rozi bo'laman. Ammo hozir faqat futbolchilik haqida o'ylayapman.

- Bir paytlari Luis Enrike bilan maydonda birga to'p surgansiz. Endi esa, u sizning murabbiyingiz...

- O'zaro munosabatlarimiz ajoyib. Luis bilan nafaqat futbol, balki boshqa narsalar haqida ham gaplashamiz. Hozir mening qachon va qancha o'ynashimni u hal qiladi.

- Nima uchun u sizga ukasidek munosabatda bo'lishini aytadi?

- CHunki ikki yil birga to'p surganmiz. Axir u ham barchamiz kabi oddiy inson.

- Sizningcha, kim bilan ishlash osonroq: Enrike, Gvardiola yoki Raykaard?

- Futbol tinimsiz o'zgarib turadi. Asosiysi - maqsadga erishish. Albatta, murabbiy ishonch bildirib tursa, futbolchi o'zini yaxshi his qiladi. Barselonaning har bir murabbiyi bilan yaxshi munosabatda bo'lganimdan xursandman.

- Luis Enrike kelganidan so'ng jamoa o'yin uslubi qanchalik o'zgardi?

- Barselona uslubini o'zgartirib bo'lmaydi. Klubga turli qarashga ega murabbiylar kelishadi, biroq usul oldingidek qolaveradi. O'zgarishlarga qo'l uriladi, deb hisoblamayman.

- SHu kunlarda Gvardiola Kamp Nouga qaytadi. Ammo Manchester Siti bilan. Pepni yana mag'lub etishga tayyormisizlar?

- Ha, yana shunday bo'lishini istaymiz. Lekin nima qilganda ham Gvardiola jamoamiz uchun yaqin insonligicha qolaveradi.

- Manchester Siti ham Barselona yoki Bavariya singari harakat qiladimi?

- Jamoa ichida turmay bu haqda bir nima deyish qiyin. Xosepning qanday ishlashini bilaman. U shogirdlari imkoniyatlarini yaxshi biladi va buni oldindan his qiladi.

- Klaudio Bravoning ketishi haqida nima deysiz?

- Bu uning shaxsiy ishi. Klaudio jamoamizda qolmoqchi edi. Lekin bu erda raqobat o'ta kuchli. Har bir inson o'z taqdirini o'zi hal qilishga haqli.

- Barselonaning joriy mavsumdagi maqsadlari qanday?

- Muxlislar yana sovrinlar yutishimizni istashadi. O'tgan ikki yil ichida ko'plab yutuqlarga erishdik. SHunga qaramay, to'xtashni istamaymiz. Har bir mavsumni noldan boshlaymiz.

- Joriy mavsum barcha turnirlarda g'olib chiqish mumkinmi?

- Hozir oktyabr. SHunday ekan, bashorat qilish qiyin. Lekin biz hamisha g'alaba uchun maydonga tushamiz.

- Lionel Messining Argentina termasidagi holati haqida qanday fikrdasiz?

- Bazan barchasi siz istagandek bo'lmaydi. Har qanday vaziyatda ham u jamoasiga foyda keltirish tarafdori.

- Messini boshqa klubda tasavvur qila olasizmi?

- Yo'q. Bu haqda hattoki, o'ylamayman ham. Ishonchim komil, Leo faoliyatining oxiriga qadar Barselonada o'ynaydi.

- Messi bilan uning o'yini xususida gaplashganmisiz?

- Albatta. Unga hamisha Kerakli vaqtda, kerakli joyda paydo bo'lgansan, deyman. Jamoamizda shunday futbolchining borligi ajoyib. U bilan futboldan tashqarida ham ancha yaqinmiz.

- Ispaniya termasi Rossiyadagi jahon chempionatiga boradimi?

- Umid qilamanki, buning uddasidan chiqamiz.

J.BOBOXONOV tayyorladi