Andrey Kojokar: "Lokomotiv"da o'zimni namoyon qila olmay tark etganim alamli"

"To'g'risini aytsam O'zbekistonni tark etayotganim biroz alamli, Toshkentga, odamlarga o'rganib qolgandim. O'zbekistondagi qisqa faoliyatim menga hayotiy tajriba bo'lib xizmat qilmoqda. O'zimni ko'rsata olmadim, bunga imkon bo'lmadi. Sportchiga ishonmaslik eng og'ir holat. Bitta narsadan xafaman "Lokomotiv"da o'zimni yorqin namoyish eta olmay ketayapman" - deydi Andrey Kojokar.

- "Lokomotiv" futbol klubi haqida qanday fikrdasiz?
- Klub chempion bo'lish uchun katta ishlarni amalga oshirmoqda. Jamoa to'g'ri yo'lda ekaniga ishonaman. G'alaba qozonish uchun barcha sharoitlarni yaratib bergan rahbariyatga minnatdorchilik bildiraman.

- Nima deb o'ylaysiz bu erda o'zingizni to'liq namoyish etishga nima xalal berdi?
- Menimcha bunga bosh murabbiy o'zgargani tasir qildi. Jamoaga Vadim Abramov olib kelindi, uning o'yinga boshqacha qarashlari mavjud ekan.

- Endigi rejalaringiz, qaerga yo'l olasiz?
- O'z uyimga ketayapman, oilam bilan birga dam olmoqchiman. Kelajagim haqida hech nima deya olmayman. Balki, O'zbekistonga qaytarman. Bundan faqat xursand bo'lardim.

- So'nggi so'z o'rnida nima deya olasiz?
- Rahbariyat va futbolchilarga rahmat aytaman, meni qo'llab turgan klub muxlislariga minnatdorchilik bildiraman. Umid qilamanki, "Lokomotiv" o'z oldiga qo'yilgan barcha maqsadga eta oladi. Men aynan shu jamoa muxlisi bo'lib qolaman.

Ro'zimurod Usmonov.